گاندربل: وادی کشمیر میں مئی کے پہلے ہفتے سے ہی چیری کا سیزن شروع ہوتا ہے اور یہ سیزن تقریبا جون کے آخری ہفتے تک جاری رہتا ہے، تاہم اس سال اپریل سے ہی لگاتار بارشوں اور موسم میں اتار چڑھاؤ کی وجہ سے وادی کشمیر کے ساتھ ساتھ گاندربل ضلع میں بھی ان فصلوں کو شدید نقصان پہنچا ہے۔ لیکن اب اگرچہ کچھ مقامات پر فصلوں کو کم ہی نقصان پہنچا ہے، تاہم کھانے میں وہ مزہ نہیں ہے جو کہ گاندربل کے گوٹلی باغ علاقے کے چیری میں مزہ ہوتا تھا۔
یہی وجہ ہے کہ موسم میں اتار چڑھاؤ اور لگاتار بارشوں کی وجہ سے اس فصل سے وابستہ کسان اور باغ مالکان پریشانی میں مبتلا ہو چکے ہیں۔ حالانکہ شروع شروع میں جب باغات کی طرف دیکھا جارہا تھا، تب ایسا لگ رہا تھا کہ اس سال فصل بہت زیادہ ہوگی۔ لیکن بارشوں کی وجہ سے وادی میں ہر ایک جگہ پر کسانوں کی امیدوں پر پانی پھر گیا۔
گوٹلی باغ گاندربل جہاں چیری کی فصل زیادہ بہت زیادہ ہوتی ہے، باغ مالکان نے بتایا کہ معیاری کیڑے مار ادویات کے چھڑکاؤ سے لے کر کھاد اور کھاد کے بروقت استعمال تک، انہوں نے اس سال اچھی اور معیاری پیداوار کو یقینی بنانے کے لیے ہر قدم اٹھایا ہے، لیکن موسم کی وجہ سے سب کچھ الٹا ہو کر رہ گیا۔ باغ مالکان نے کہا کہ گزشتہ ماہ خراب موسم اور ژالہ باری نے تباہی مچا دی اور فصل کو 50 فیصد نقصان پہنچا۔ باغ مالکان نے کہا کہ انہیں اس سیزن میں موسم کی خرابی کی وجہ سے چیری کی فصل کو بہت زیادہ نقصان پہنچا ہے۔
شوپیاں، گاندربل، کولگام اور ٹنگمرگ، رفیع آباد اور واگورہ ژالہ باری سے سب سے زیادہ متاثر ہوئے ہیں۔ انہوں نے کہا کہ چیری کی فصل کو بڑے پیمانے پر نقصان کے بعد چیری کی صرف ایک محدود مقدار وادی کی منڈیوں میں پہنچ رہی ہے۔ بھاری پیکیجنگ اور شپنگ کے اخراجات کی وجہ سے، کسان چیری بھیجنے کا خطرہ مول نہیں لیتے ہیں۔ ہمیں لگتا ہے کہ اس سال بہت کم مقدار میں چیری کشمیر کی منڈیوں سے باہر جائے گی۔
باغ مالکان نے کہا کہ گوٹلی باغ علاقے میں اگرچہ محکمہ باغبانی کے افسران کی موجودگی میں ایک ٹیم بھی آئی تھی، اور نقصان کا جائزہ بھی لے کر گئے ہیں تاہم اب دیکھنا ہے کہ سرکار کی طرف سے ہمیں کچھ مدد ہوگی یا صرف علاقے کے دورے تک ہی محدود رہے گا۔ واضح رہے کہ کشمیر میں چیری کی آٹھ اقسام اگائی جاتی ہیں: مخمالی، سیا، مشری، جدی، اٹلی، ڈبل گلاس ، وشکان اور سٹیلا۔ آٹھ اقسام میں سے چار - مشری، جدی، مخملی اور ڈبل گلاس کی مارکیٹ میں اچھی مانگ ہے۔ مشری کو دیگر اقسام کے مقابلے میٹھا سمجھا جاتا ہے۔ مشری کی قسم، جو اپنے صحت کے فوائد کے لیے مشہور ہے، گزشتہ سال دبئی کو برآمد کی گئی تھی۔
مزید پڑھیں: امسال 13 سے 15 ہزار میٹرک ٹن چیری برآمد ہونے کی توقع، ڈائریکٹر ہاٹیکلچر کشمیر
