غیر مقامی مزدوروں کا قرنطینہ مرکز سے رہائی کا مطالبہ

جموں و کشمیر میں ہر برس غیر مقامی مزدوروں کے ساتھ ساتھ کاریگروں کی ایک بڑی تعداد بھی وادی میں روزگار کے سلسلے میں آتی ہے۔

تاہم امسال کورونا وائرس کے پیش نظر جاری لاک ڈاؤن کے سبب غیر مقامی مزدور اور کاریگر کام نہیں کر پائے۔ ملک میں جاری لاک ڈاؤن کی وجہ سے یہ مزدور نہ کام کر پاتے ہیں اور نہ ہی گھر واپس جا پارہے ہیں جس سے ان کی مشکلات میں اضافہ ہوا ہے۔

اگرچہ انہیں قرنطینہ مرکز میں رکھا گیا ہے لیکن اب ان کی مانگ ہے کہ انہیں یا تو گھر جانے دیا جائے یا پھر انہیں مقامی رہائش گاہ (ڈیروں) میں واپس جانے دیا جائے۔ اس سلسلہ میں اج گورنمنٹ ڈگری کالج پلوامہ میں قیام پذیر تقریبا 250 مزدوروں نے قرنطینہ مرکز سے رہائی کا مطالبہ کیا۔مزدوروں نے کہا کہ تقریبا دو ماہ سے وہ قرنطینہ مرکز میں ہیں۔ اس دوران کوئی بھی سرکاری اہلکار ان کے پاس نہیں آیا۔

مزدوروں کا مطالبہ ہے کہ انہیں یا تو مقامی رہائش گاہ ( ڈیروں )مقامات پر جانے دیا جائے یا انہیں گھروں میں جانے کی اجازت دی جائے تاکہ وہ اپنی روزی روٹی حاصل کرسکیں جس کے لئے وہ بنیادی طور پر ریاست میں آئے تھے۔