صدر جمہوریہ ہند کو دراصل خطہ لداخ کے دراس جانا تھا جہاں انہیں وار میموریل پر منعقد ہونے والی ایک تقریب میں کرگل جنگ کے شہیدوں کو خراج عقیدت پیش کرنا تھا۔
تاہم موسم کی خرابی کی وجہ سے صدر جمہوریہ کے پروگرام میں تبدیلی لائی گئی اور متذکرہ تقریب سری نگر کی بادامی باغ فوجی چھاونی میں منعقد کی گئی۔
صدر جمہوریہ نے سرینگر میں کرگل جنگ کے شہیدوں کو خراج عقیدت پیش کرنے کے بعد اپنے ایک ٹویٹ میں کہا: 'کرگل وجے دیوس کے موقع پر سری نگر میں چنار کور میں قائم وار میموریل پر شہداء کو خراج عقیدت پیش کیا۔
بھارت اپنے ان فوجی جوانوں کا ہمیشہ مشکور رہے گا جنہوں نے کرگل جنگ میں اپنا کردار ادا کیا۔ انہوں نے ملک کی خودمختاری کا انتہائی بہادری کے ساتھ دفاع کیا'۔
سری نگر کی بادامی باغ فوجی چھاونی میں منعقد ہونے والی تقریب میں صدر جمہوریہ ہند کے علاوہ ریاستی گورنر ستیہ پال ملک، فوج، سول و پولیس انتظامیہ کے سینئر عہدیداروں نے شرکت کی۔ دراس میں منعقد ہونے والی تقریب میں فوجی سربراہ جنرل بپن راوت نے شرکت کی۔
سرکاری ذرائع نے بتایا کہ صدر جمہوریہ رام ناتھ کوند جمعہ کی صبح نئی دہلی سے سری نگر ائرپورٹ پہنچے جہاں سینئر سول، فوج و پولیس عہدیداروں نے ان کا استقبال کیا۔ یہاں سے انہیں بذریعہ ہیلی کاپٹر بادامی باغ لے جایا گیا۔
قابل ذکر ہے کہ 1999 کی کرگل جنگ کی یاد میں 26 جولائی کو ہر سال 'وجے دیوس' کے طور پر منایا جاتا ہے۔
