شمالی کشمیر کے ضلع بارہمولہ کے میونسپل کونسل کے صدر عمر ککرو کے ساتھ ساتھ قصبے کے مختلف وارڈوں کے نو کونسلرز جموں و کشمیر اپنی پارٹی میں شامل ہوگئے ۔
جموں و کشمیر اپنی پارٹی نے اس سلسلے میں ایک بیان جاری کیا ہے جس کے مطابق عمر ککرو کے علاوہ جو بارہمولہ میونسپل کونسل کے کونسلرز آپنی پارٹی میں شامل ہوئے ان میں نائب صدر ایم سی بارہمولہ مدثر احمد تنترے، کونسلر جسبیر کور وزیر، کونسلر مشرا بیگم، کونسلر غلام رسول ملک، کونسلر گردیپ کور، کونسلر عاشق حسین گنائی، کونسلر فریدہ بیگم ، کونسلر صبا اعجاز اور کونسلر ظہور احمد گوجری شامل ہیں ۔
دریں اثنا ضلع گلشن سنہوترا (سابق ریاستی جنرل سکریٹری جنتا دل) اور وریندر گنجو (مہاجر سیل جنرل سکریٹری) سمیت ضلع بارہمولہ کے مختلف حصوں سے متعدد نامور سیاسی کارکنان بھی اس موقع پر اپنی پارٹی میں شامل ہوئے ہیں۔
شمولیت کی تقریب اپنی پارٹی کے صدر سید محمد الطاف بخاری ، جنرل سکریٹری رفیع احمد میر، ریاستی سکریٹری اور ضلعی صدر بڈگام منتظیر محی الدین، صوبائی صدر کشمیر محمد اشرف میر ، کوآرڈینیٹر شمالی کشمیر فضل محمود بیگ کی موجودگی میں انجام دی گئی ۔
پارٹی میں شامل ہونے والے کونسلرز کا خیرمقدم کرتے ہوئے الطاف بخاری نے ان پر زور دیا کہ وہ ضلع میں اپنے اپنے علاقوں میں لوگوں کی پریشانیوں کو دور کرنے کے لئے اپنی انتھک کوششیں کریں۔
اس موقع پر خطاب کرتے ہوئے عمر کاکرو نے نچلی سطح پر پارٹی کو مضبوط بنانے کے علاوہ اپنی پارٹی قیادت کی رہنمائی میں لوگوں کی فلاح و بہبود کے لئے کام کرنے کا عہد کیا۔
