شمالی کشمیر کے ضلع بانڈی پورہ کے حاجن قصبے میں سڑکوں کی خستہ حالت کی وجہ سے لوگوں کو کافی مشکلات کا سامنا کرنا پڑرہا ہے- مقامی لوگوں کا کہنا ہے کہ سڑکوں کی حالت ناگفتہ بہ ہونے کے سبب انہیں آمد و رفت میں کافی مشکلات کا سامنا کرنا پڑرہا ہے-
برہم لوگوں کا کہنا ہے کہ سال 2014 سے مسلسل قصبے کی اندرونی سڑکیں خراب ہیں لیکن انتظامیہ اس حوالے سے کوئی قدم نہیں اٹھا رہا ہے-
مقامی باشندوں نے ای ٹی وی بھارت سے بات کرتے ہوئے کہا کہ سڑکوں کی ابتر حالت کی وجہ سے طلباء کی تعلیم بھی متاثر ہورہی ہے کیونکہ علاقہ میں معمولی بارش کی وجہ سے طلباء کا گھروں سے باہر نکلنا ناممکن ہو جاتا ہے۔
ادھر، علاقے میں مریضوں کو بھی ہسپتال آنے جانے میں مشکلات کا سامنا کرنا پڑرہا ہے۔ سڑکوں کی حالت اس قدر خستہ ہے کہ کئی ٹرانسپوٹرز نے علاقہ کے لئے سروس بھی بند کر دی ہے۔
مقامی لوگوں نے انتظامیہ سے اپیل کی ہے کہ وہ اس سلسلہ میں مداخلت کر کے لوگوں کی مشکلات کو حل کریں۔
