ضلع پلوامہ کے لری بل ترال گاؤں میں بجلی سپلائی نہ ہونے سے یہاں کے لوگ محکمہ بجلی سے نالاں ہیں، جس کے خلاف لوگوں نے سڑک پر نکل کر سماجی دوریاں برقرار رکھتے ہوئے خاموش احتجاج کیا۔
اس دوران مقامی لوگوں نے اس بات پر زبردست ناراضگی کا اظہار کیا کہ حکومتی دعوؤں کے باوجود ان کے محلے میں بجلی دستیاب نہیں ہے۔ جس کی وجہ سے طلباء پڑھ نہیں پاتے ہیں اور لوگوں کو پریشانیوں کا سامنا کرنا پڑتا ہے۔
احتجاج کررہے لوگوں کا کہنا تھا کہ ان کا محلہ گزشتہ بیس برسوں سے بجلی سے محروم ہے اور اب رہائشی تنگ آمد بہ جنگ آمد کے مصداق احتجاج کرنے پر مجبور ہوئے ہیں۔ اس بستی کے لیے ایک ٹرانسفارمر منظور تو ہوا لیکن وہ اب تک نہیں لگ سکا ہے۔ عوام نے مطالبہ کیا کہ انتظامیہ بجلی کی سپلائی کو بحال کرے جس سے عوام راحت کی سانس لے سکیں۔