میٹنگ میں صوبائی کمشنر نے اس مقصد کے لئے ضلع انتظامیہ کی جانب سے کی گئی کوششوں کی سراہنا کی۔ انہوں نے کہا کہ یہ پلانٹ پچھلے سات برسوں سے بند پڑا تھا۔
صوبائی کمشنر نے متعلقین کے ساتھ مشاورت کے بعد اس پلانٹ کو کارگر بنانے کے لئے عملی اقدامات کو حتمی شکل دی۔ اس سلسلے میں متعلقہ حکام کو ضروری ہدایات دی گئی ہیں۔
ڈویثرنل کمشنر نے مِلک پروڈیوسرس کواپریٹو فیڈریشن کو ہدایت دی کہ وہ پیکنگ میٹریل اور اس کی چھپائی میں خاطر خواہ سرمایہ کاری کریں۔
انہوں نے زور دے کر کہا کہ اس پلانٹ کی بلا خلل کارکردگی لیہہ اور کرگل اضلاع کے دودھ کی پیداوار کرنے والے افراد کے حق میں ہے۔
اس سلسلے میں ٹرانسفارمر نصب کرنے اور پانی کی سپلائی کو یقینی بنانے کے لئے محکمہ بجلی اور صحت عامہ کے انجینئروں کو بھی ضروری ہدایات دی گئیں۔
ڈپٹی کمشنر لیہہ اونی لواسہ نے یقین دلایا کہ پلانٹ کے اپریٹنگ عملے کو ضروری تربیت دی جارہی ہے تا کہ اس پلانٹ کی کارکردگی کو موثر بنایا جاسکے۔
چیئرمین ایل ایم پی سی ایف لیہہ پھونسنگ آنگچُک نے کہا کہ فیڈریشن 52 دیہات میں روزانہ تقریباً 14 ہزار لیٹر دودھ کی پیداوار کرتی ہے۔
انہوں نے دودھ صاف کرنے والے پلانٹ کو کارگر بنانے کے لئے صوبائی کمشنر کا شکریہ ادا کرتے ہوئے فیڈریشن کی جانب سے مکمل تعاون کا یقین دلایا۔
صوبائی کمشنر نے دودھ صاف کرنے والے پلانٹ کا دورہ کر کے وہاں موجود مشینوں اور دیگر سازو سامان کا معائنہ کیا۔
انہوں نے سی اے ایچ او لیہہ ڈاکٹر اقبال کو ہدایت دی کہ وہ تکنیکی اسامیوں کو معرض وجود میں لانے کے لئے اپنی تجویز دیں۔
اس سے قبل منعقد ہوئی میٹنگ میں جو افسران موجود تھے اُن میں چیف انیمل ہسبنڈری افسر لیہہ، ڈپٹی رجسٹرار کواپریٹوز لیہہ، اسسٹنٹ کمشنر ڈیولپمنٹ لیہہ، ایگزیکٹو انجینئر ایم اینڈ آر ای، پی ڈی ڈی لیہہ اور ایگزیکٹو انجینئر پی ایچ ای لیہہ کے علاوہ ملک کواپریٹو کے ممبران بھی شامل تھے۔
