ریڈ زون علاقوں میں بنیادی سہولیات کا فقدان: نیشنل کانفرنس کا الزام

نیشنل کانفرنس نے ریڈ زون قرار دیئے گئے علاقوں میں بنیادی سہولیات کے فقدان پر تشویش کا اظہار کرتے ہوئے انتظامیہ پر زور دیا ہے کہ ان علاقوں میں ہر قسم کی ضروریات زندگی میسر رکھنے کے لئے ٹھوس اقدامات اٹھائے جائیں۔

پارٹی کے ترجمان عمران نبی ڈار نے اپنے ایک بیان میں کہا کہ شمال و جنوب میں ریڈ زون قرار دیئے گئے علاقوں سے مسلسل بنیادی ضروریات کی عدم دستیابی کی شکاتیں موصول ہورہی ہیں یہاں تک کہ ادویات کی قلت سے بھی آبادیوں کو مشکلات کا سامنا کرنا پڑ رہا ہے۔

متعدد ریڈ زون علاقوں کی آبادیوں کے مطابق انتظامیہ نے انہیں حالات کے رحم و کرم پر چھوڑ دیا ہے۔

انہوں نے کہا کہ علاقے سیل ہونے اور اپنے اپنے گھروں میں محصور ہونے کی وجہ سے ریڈزونوں کی آبادیاں کسی بھی قسم کی خریداری کرنے سے قاصر ہیں۔ ایسے میں انتظامیہ کو چاہئے کہ گھر گھر جاکر ضروریاتِ زندگی کی فراہمی یقینی بنائی جائے۔

این سی ترجمان نے صوبائی انتظامیہ اور ضلع ترقیاتی کمشنروں پر زور دیا کہ ریڈ زون قرار دیئے گئے علاقوں کی آبادیوں کو تمام بنیادی سہولیات میسر رکھنے کے لئے جنگی بنیادوں پر اقدامات اٹھائیں