کشمیر میں آج اٹھویں روز بھی پروازیں منسوخ کر دی گئی جس کی وجہ سے کشمیر کا بیرون دنیا سے فضائی رابطہ منقطع ہوگیا ہے۔
برف باری کی وجہ سے جہاں وادی بھر میں معمولات زندگی مفلوج ہوکر رہ گئے ہیں وہیں بجلی کا نظام ایک بار پھر بری طرح سے متاثر ہوکر رہ گیا ہے جس کے نتیجے میں وادی کے بیشتر علاقے گھپ اندھیرے میں ڈوب گئے ہیں۔
محکمہ موسمیات کے مطابق پیر کے روز جموں و کشمیر میں موسم خوشگوار رہنے کا امکان ہے۔
محکمہ موسمیات کے علاقائی ناظم سونم لوٹس نے کہا کہ گزشتہ ایک ہفتے سے جاری گہری دھند میں نمایاں کمی آئے گی اور ایئرپورٹ پر فضائی ٹریفک جلد بحال ہونے کا امکان ہے۔
سرینگر ایئرپورٹ کے ڈائریکٹر سنتوش ڈوکے نے کہا کہ ' موسم کی خرابی اور شدید کہرے کی وجہ سے سرینگر ہوائی اڈے پر تمام پروازیں منسوخ کردی گئیں اور مسلسل آٹھویں روز بھی اب تک کسی پرواز نے اڑان نہیں بھری ۔'
سنتوش ڈوکے نے کہا کہ برف باری اور گھنے کہرے کی وجہ سے ہوائی اڈے پر نہایت ہی کم روشنی ہے جس کے سبب فلائٹ آپریشن کے لیے حالات موزوں نہیں تھے۔
وادی کشمیر میں برف باری اور قہرے کے باعث معمولات زندگی متاثر ہے وہیں شدید سردی اور گھنے کہرے نے کوگوں کو مزید مشکلات میں مبتلا کر دیا ہے۔
وادی کشمیر میں تمام پروازیں منسوخ ہونے سے ہزاروں مسافروں کے سفری منصوبے متاثر ہوئے ہیں۔
