ملک کے مختلف حصوں میں 74 ویں یوم آزادی کی تقریبات کی تیاریاں زورو شور سے کی جا رہی ہیں۔
اس دوران جموں و کشمیر کے ضلع ادھم پور اور ڈودہ میں بھی 74 ویں یوم آزادی کے موقع پر جمعرات کے روز فُل ڈریس ریہرسل کا انعقاد کیا گیا۔ جہاں ڈودہ کے ایڈیشنل ڈپٹی کمشنر کشوری لال اور ادھم پور کے اے ڈی سی نے قومی پرچم کشائی کرکے مارچ پاسٹ کیا اور پریڈ کو سلامی دی۔
مارچ پاسٹ پریڈ میں جموں و کشمیر پولیس دستہ، جموں و کشمیر آرمڈ پولیس (جے کے اے پی) اور ایس ایس بی کے جوانوں نے حصہ لیا جبکہ تعلیمی اداروں کے طلباء اور طالبات نے بھی ثقافتی پروگرام پیش کئے۔
اس موقع پر ادھم پور کے اے ڈی سی نے ریہرسل میں بیٹھے لوگوں کو 74 ویں یوم آزادی کی مبارک باد پیش کرتے ہوئے کہا کہ 'ہمیں ایک طویل جدوجہد کے بعد آزادی حاصل ہوئی ہے، یوم آزادی نہ صرف ایک قومی دن ہے، بلکہ یہ ایک اہم دن بھی ہے جو ہمیں آزادی کے شہداء کی قربانیوں کی یاد دلاتا ہے'۔
قابل ذکر ہے کہ 74 ویں یوم آزادی کی تقریب اسپورٹس اسٹیڈیم ڈوڈہ اور گورنمنٹ پی جی ڈگری بوائز کالج ادھم پور میں منعقد ہوگی، کورونا وائرس کے پیش نظر یہ پروگرام مختصر ہوگا اور انتظامیہ کی طرف سے جاری کردہ تمام ہدایات پر بھی عمل بھی کیا جائے گا۔
اس کے علاوہ صرف تین ثقافتی پروگرام پیش کیے جائیں گے۔ جبکہ عوام تک یوم آزادی کی تقریبات کو پہنچانے کے لئے مقامی چینلز کے ذریعے براہ راست نشر کیا جائے گا۔
