وادی کشمیر اور لداخ میں بدھ کے روز کم سے کم درجۂ حرارت نقطۂ انجماد سے نیچے رہا۔ تاہم دسمبر اور جنوری کی شدید سردی سے عوام کو راحت ملی ہے۔
محکمۂ موسمیات کے ایک عہدیدار نے کہا کہ 'جموں و کشمیر اور لداخ میں اگلے دس دن کے دوران خشک موسم کی توقع ہے۔ درجۂ حرارت میں کمی آنے کے امکانات کم ہیں جبکہ درجۂ حرارت میں مزید اضافے کا بھی امکان ہے۔'
محکمۂ موسمیات کے مطابق گرمائی دارالحکومت سرینگر میں بدھ کی رات کم سے کم درجۂ حرارت منفی 1.6 ڈگری سینٹی گریڈ ریکارڈ کیا گیا۔
بتادیں کہ قبل ازیں سرینگر میں رواں سیزن کے دوران 14 جنوری کو سرد ترین رات درج ہوئی تھی جب کم سے کم درجۂ حرارت منفی 8.4 ڈگری ریکارڈ ہوا تھا اور سردیوں کا پچیس سالہ پرانا ریکارڈ ٹوٹ گیا تھا۔
وادی کے مشہور دہر سیاحتی مقام گلمرگ میں کم سے کم درجۂ حرارت منفی 4 ڈگری سینٹی گریڈ جبکہ وادی کے دوسرے مشہور سیاحتی مقام پہلگام میں کم سے کم درجۂ حرارت منفی 4 ڈگری سینٹی گریڈ ریکارڈ ہوا ہے۔
وہیں جموں شہر میں کم سے کم درجۂ حرارت 11، کٹرا میں 10.2، بٹوت میں 5.8، بنیہال میں 7.2 اور بھدرواہ میں 2.5 ڈگری سینٹی گریڈ ریکارڈ کیا گیا۔
