مرکزی وزیر دفاع راجناتھ سنگھ جموں و کشمیر اور لداخ یونین ٹریٹریوں کے دو روزہ دورے پر جمعے کی صبح یہاں پہنچ گئے۔
بتادیں کہ وادی گلوان میں چین اور بھارت کے درمیان ماہ مئی سے کشیدگی شدت اختیار کرنے کے بعد یہ موصوف وزیر دفاع کا لداخ کا پہلا دورہ ہے۔ اس موقع پر چیف آف ڈیفنس اسٹاف جنرل بپن راوت اور چیف آف آرمی سٹاف جنرل منوج مکند ناروانے بھی ان کے ہمراہ ہیں۔
ذرائع کے مطابق راجناتھ سنگھ نے اپنے دو روزہ دورے کے پہلے روز حقیقی کنٹرول لائن کی تازہ سیکورٹی صورتحال کا جائزہ لیا اور فوجی افسروں سے تازہ صورتحال کی تفصیلی بریفنگ حاصل کی۔
سرکاری ذرائع نے بتایا کہ موصوف مرکزی وزیر دفاع جمعے کی صبح دلی سے روانہ ہوکر لیہہ ہوائی اڈے پر اترے اور براہ راست سٹاکنہ پہنچے جہاں انہوں نے مسلح فورسز کی طرف سے ایئر ڈراپنگ مہارتوں کا مشاہدہ کیا۔
انہوں نے کہا کہ اس کے علاوہ سٹاکنہ میں وزیر دفاع، چیف آف ڈیفنس سٹاف اور چیف آف آرمی سٹاف کی موجودگی میں بھارتی فوج کی ٹی 90 ٹینکوں اور بی ایم پی جنگی گاڑیوں نے بھی مشقیں کیں۔
قبل ازیں راجناتھ سنگھ نے اپنے ایک ٹویٹ میں کہا تھا: 'جموں و کشمیر اور لداخ کے دو روزہ دورے کے لئے لیہہ جارہا ہوں، سرحدوں پر اگلے علاقوں کا دورہ کر کے تازہ صورتحال کا جائزہ لوں گا اور ان علاقوں میں تعینات مسلح فوجی جوانوں کے ساتھ ملاقات کروں گا'۔
قابل ذکر ہے کہ لداخ میں حقیقی کنٹرول لائن پر ماہ مئی کی پانچ تاریخ سے ہندوستان اور چین کے درمیان ٹکراؤ کی صورتحال جاری تھی کہ اس دوران طرفین کے فوجیوں کے درمیان 15 اور 16 جون کی درمیانی شب خونین جھڑپ ہوئی جس میں ایک کرنل سمیت بیس بھارتی فوجی از جان جبکہ درجنوں زخمی ہوئے تھے۔
طرفین کے درمیان کشیدگی میں اضافہ ہونے کے بعد جہاں لداخ کے لوگوں میں تشویش کی لہر دوڑ گئی تھی وہیں ملک کے مختلف حصوں میں چین کے خلاف احتجاجی مظاہرے درج ہوئے تھے جن میں چینی ساخت کی مصنوعات کو نذر آتش کرنے کے علاوہ ان کا بائیکاٹ کرنے کا مطالبہ کیا جارہا تھا۔
تاہم بعد ازاں طرفین کے درمیان سفارتی و فوجی سطح پر مذاکراتی عمل شروع ہوا جس کے نتیجے میں کشیدگی میں تفاوت درج ہوئی۔
وزیر دفاع کے دورے سے قبل وزیر اعظم نریندر مودی نے بھی ماہ رواں کی 3 تاریخ کوحقیقی کنٹرول لائن کا دورہ کر کے زخمی فوجی اہلکاروں کی عیادت کی تھی۔
وزیر اعظم نے 'نمو' نامی فارورڈ علاقے میں فوجی جوانوں سے خطاب کرتے ہوئے چین کا نام لئے بغیر کہا تھا کہ دنیا میں توسیع پسندی کی جنگ کا زمانہ ختم ہوچکا ہے بلکہ ترقی کی جنگ کا دور چل رہا ہے۔
انہوں نے کہا تھا کہ تاریخ گواہ ہے کہ توسیع پسندی کی جنگ لڑنے والوں کو یا تو ہمیشہ شکست سے دوچار ہونا پڑا ہے یا واپس لوٹنا پڑا ہے۔
