ماہ اپریل میں پھل دار درختوں خاص کر سیب کے باغات میں شگوفہ پھوٹ پڑتے ہیں۔اس موسم میں پولی نیشن کا عمل شروع ہو جاتا ہے۔ اس عمل کے دوران کھلی دھوپ اور موسم کا خوشگوار ہونا کافی اہمیت کا حامل ہوتا ہے..
تاکہ پولی نیشن کا عمل احسن طریقہ سے مکمل ہو سکے۔ تاہم موسم مسلسل ابر آلود رہنے اور غیر متوقع بارشوں کی وجہ سے پولی نیشن کے عمل میں خلل پڑا جس کے نتیجہ میں اکثر میوہ باغات کے پُولن پختہ ہونے سے قبل مُرجھا گئے ہیں۔
جنوبی کشمیر کے ضلع اننت ناگ کے مرہامہ علاقہ سے تعلق رکھنے والے میوہ کاشتکاروں کا کہنا ہے کہ گزشتہ سال بھی نامساعد حالات کی وجہ سے کافی نقصانات سے دوچار ہونا پڑا تھا۔ تاہم وہ امید لگائے بیٹھے تھے کہ رواں برس اچھی فصل ہوگی
جس سے وہ پچھلے نقصان کی بھرپائی کر پائیں گے۔تاہم (پولن) شگوفوں کے مرجھانے کی وجہ سے وہ تشویش میں مبتلا ہوئے ہیں۔انہوں نے محکمہ باغبانی سے توجہ مبذول کرنے کی اپیل کی۔
