اننت ناگ میں انتظامیہ نے کورونا وائرس کو پھیلنے سے روکنے کے لیے دفعہ 144 نافذ کرکے عوامی مقامات پر 5 سے زائد افراد کو جمع ہونے پر پابندی عائد کر دی ہے۔
اننت ناگ ضلع مجسٹریٹ بشیر احمد ڈار کی جانب سے یہ حکم نامہ جاری کیا گیا ہے جس کے مطابق انتظامیہ کی جانب سے جاری کردہ احکامات کی خلاف ورزی کرنے والوں کے خلاف سخت کاروائی کرنے کا انتباہ دیا گیا ہے۔
خیال رہے کہ اس سے قبل جموں و کشمیر کے ضلع بڈگام، کشتواڑ، کپواڑ ، گاندربل کے ڈپٹی کمشنرز نے بھی اسی طرح کی پابندیاں عائد کردی ہیں۔
واضح رہے کہ چین کے ووہان شہر سے یہ وبا پھیلی اور دنیا کے تقریباً 130 ممالک اس وبا سے متاثر ہوگئے ہیں۔ اس بیماری کی وجہ سے سب سے زیادہ اموات چین میں ہوئی ہیں، جبکہ دوسرے نمبر پر اٹلی ہے جہاں 2158 افراد ہلاک ہوچکے ہیں۔
