مواصلاتی نظام بند ہونے سے لوگوں کو مشکلات کا سامنا

پلوامہ میں حزب المجاہدین کے عسکری کمانڈر ریاض نائیکو کی ہلاکت کے بعد وادی میں مسلسل مواصلاتی نظام اور موبائل انٹرنیٹ خدمات معطل ہیں جس کی وجہ سے عام زندگی کافی متاثر ہوئی ہے۔

لوگوں کے مطابق مواصلاتی نظام کے پھر ایک بار متاثر ہونے سے نہ صرف معمول کی زندگی میں رکاوٹیں حائل ہو رہی ہیں بلکہ کورونا کی موجودہ صورتحال میں بھی موبائل فون بند ہونے سے طرح طرح کی مشکلات درپیش آئی ہیں۔

لوگوں کے لاک ڈاؤن کے چلتے اب اکثر بیمار موبائل فون پر ڈاکٹروں سے طبی مشورے حاصل کرتے تھے تاہم اب وہ سلسلہ بھی بند ہو گیا ہے۔ ایسے میں اب موبائل فون بند ہونے کا اثر مریضوں پر بھی حاوی ہوا ہے۔

لوگوں کا یہ بھی ماننا ہے کہ بچوں کا درس و تدریس بند ہونے کے ساتھ ساتھ لوگوں کا قریبی رشتہ داروں سے بھی میل جول کافی متاثر ہوا ہے۔ کیونکہ لاک ڈاؤن کے دوران جہاں لوگوں گھروں کے اندر ہی رہنے کو ترجیح دے رہے ہیں وہیں فون پر رشتہ داروں کی خیر خبر اور دیگر روابط بھی اثر انداز ہوۓ ہیں۔

واضح رہے کہ وادی میں امن و قانون کی صورتحال کے چلتے اگست 2019 سے 4جی انٹرنیٹ خدمات معطل ہیں اور اب 2 جی کے ساتھ ساتھ موبائل مواصلاتی نظام بھی گزشتہ کئ روز سے بند ہونے کی وجہ سے لوگوں کی مشکلات میں مزید اضافہ ہو رہا ہے۔