ماحول کو صاف ستھرا رکھنے کے لیے بیداری مہم

جنوبی کشمیر کے ضلع پلوامہ کے ترال قصبے میں آج اسکولی بچوں کی جانب سے ماحول کو پاک و صاف رکھنے کے لیے بیداری مہم کے تحت ڈاڈسرہ سمیت کئی دیہاتوں میں ایک ریلی نکالی گئی۔

ضلع انتظامیہ اور چند اسکولوں کے اشتراک سے شروع کی گئی اس مہم میں متعدد ملازمین اور سینکڑوں طلبہ و طالبات نے حصہ لیا۔ انہوں نے ہاتھوں میں پلے کارڈز اور بینر اٹھا رکھے تھے، جن پر ماحول کو بچانے کے لیے نعرے تحریر تھے۔ بچوں نے اس دوران کئی سڑکوں اور گلی کوچوں میں صفائی کی۔

علاقے کے کئی دیہات سے ہوکر گزرنے کے بعد یہ ریلی آخر ڈاڈسرہ میں ختم ہوئی۔ بچوں کے اس قدم کی کافی سراہنا ہو رہی ہے۔ واضح رہے کہ وادی میں گزشتہ کئی برسوں سے ماحولیاتی آلودگی تیزی سے بڑھ رہی ہے جبکہ ہر سمت کوڑے کچرے کے ڈھیر جمع ہو گئے ہیں۔ جبکہ دریاؤں، ندیوں کے کنارے بھی کوڑا دان میں تبدیل ہو گئے ہیں۔ ایسے میں ماحولیات کے تئیں بیداری بے حد اہم ہے۔