پل کی خستہ حالی کی وجہ سے طلبا پریشان

جموں و کشمیر کے ضلع رامبن کی قومی شاہراہ پر ایک اسٹیل پل شدید خستہ حالی کا شکار ہے جس کی وجہ سے مقامی شہری بالخصوص اسکولی بچوں کو شاہراہ عبور کر نے میں زبردست مشکلات سے دو چار ہونا پڑتا ہے۔

مقامی لوگوں کا کہنا ہے کہ 'یہ اسٹیل پل چند برس قبل محکمہ تعمیرات عامہ نے رگھوناتھ مندر سے مسجد مارکیٹ کو جوڑنے کے لیے قومی شاہراہ کے اوپر تعمیر کیا تھا۔ تاہم غیر معیاری مٹیریئل کی وجہ سے پل چند برسوں کے اندر ہی خستہ حال ہو گیا۔'

ان کا مزید کہنا ہے کہ 'اس پل کی وجہ سے عام شہریوں اور خاص کر طلبا کو زبردست مشکلات کا سامنا کرنا پڑتا ہے'۔

انہوں نے تشویش کا اظہار کرتے ہوئے کہا کہ 'پل کی خستہ حالی کی وجہ سے کسی بھی وقت بڑا حادثہ رونما ہوسکتا ہے'۔

اس تعلق سے طلبا نے انتظامیہ سے گزارش کی ہے کہ اس پل کی جلد از جلد تعمیر و مرمت کریں تاکہ لوگوں کو راحت مل سکے۔