جموں وکشمیر کی جنت نامی ایک سات سالہ بچی کو حیدرآباد کے ایک اسکول کے نصاب میں شامل کیا گیا ہے۔ کمسن جنت دو سال سے سرینگر میں ڈل جھیل کی صفائی کر رہی ہے ۔
جنت اس وقت تیسری جماعت میں تعلیم حاصل کررہی ہے۔ جنت نے نامہ نگاروں کو بتایا کہ ' مجھے اپنے والد سے جھیل کو صاف کرنے کے لیے حوصلہ ملا ہے، مجھے تمام پہچان میرے بابا کی وجہ سے مل رہی ہے۔'
جنت کے والد طارق احمد نے کہا کہ' مجھے حیدرآباد سے اپنے دوست کا فون آیا، جس نے کہا کہ میری بیٹی کا نام اسکول کی ایک کتاب میں شامل کیا گیا ہے۔ یہ میرے لیے باعث فخر لمحہ تھا۔'
واضح رہے کہ اس سے قبل ڈل جھیل کی صفائی مہم سے جڑی کمسن جنت نے ای ٹی وی بھارت کے ساتھ ایک خاص بات چیت کے دوران کہا تھا کہ ڈل جھیل کی صفائی مہم میں سرکاری سطح پر کوئی مدد فراہم نہیں کی گئی ہے، جس کی وجہ سے اس شاہکار جھیل کو اُس اعتبار سے آلودگی سے پاک نہیں کیا گیا ہے۔
