ہمچل پردیش میں اتوار کی رات بالائی علاقوں میں برف باری کی وجہ سے لوگوں کو کافی پریشانی کا سامنا کرنا پڑ رہا ہے۔ دھرم شالہ میں شدید برفباری کے دوران سو سے زیادہ افراد کریری جھیل میں پھنس گئے ہیں۔ پھنسے ہوئے لوگوں میں چھوٹے بچے بھی شامل ہیں۔ کیریری جھیل کے پاس رات میں قیام کے لیے کوئی انتظام نہیں ہے، وہاں پر صرف خیموں کا ہی انتظام کیا گیا ہے۔
پنچایت کے ڈپٹی پردھان راہل نے بتایا کہ کریری جھیل اور اس کے آس پاس قیام کا کوئی انتظام نہیں ہے۔
وہاں کچھ لوگ اپنے خاندان کے ساتھ سیر کے لیے گئے تھے۔ ان لوگوں کے ساتھ بچے بھی موجود ہیں۔ ڈپٹی پردھان نے بتایا کہ کریری جھیل کے پاس صرف خیمے کی سہولت دستیاب ہے جب کہ اس طرح کی برف باری میں خیمے میں رہنا مشکل ہے۔ ڈپٹی پردھان راہل نے کہا کہ گاؤں سے نوجوانوں کی ریسکیو ٹیم لوگوں کو بچانے کیلئے روانہ ہوگئی ہے، لیکن نوجوانوں کے پاس امداد اور بچاؤ کے لئے بہتر سامان نہیں ہے۔
مزید پڑھیں:
حیدرآباد: عثمان نگر کے سیلاب متاثرین اب بھی مدد کے منتظر
ڈپٹی پردھان نے کہا کہ وہ پولیس اسٹیشن میکلوڈ گنج کے انچارج اور کیو آر ٹی ٹیم کا انتظار کر رہے ہیں۔ میکلوڈ گنج کے تھانہ انچارج سے بہتر امدادی سامان لانے کو کہا گیا ہے تاکہ موقع پر مدد پہنچائی جا جاسکے۔
