ریاست ہماچل پردیش کے قبائلی علاقہ کننور کی پہاڑیوں میں ہفتہ اور اتوار کی درمیانی رات میں برف باری ہونے کی وجہ سے درجہ حرارت کافی کم ہوگیا ہے۔
اطلاع کے مطابق ریاست کے نچلے علاقوں میں بارش کے باعث درجہ حرارت میں کمی واقع ہوئی ہے۔
کننور کے علاوہ ریاست کی اونچی جگہوں پر بھی برف باری ہوئی ہے۔ روہتانگ کی چوٹیوں نے بھی برف کی سفید چادر اوڑھ لی ہے۔
اس کے علاوہ بارالاچہ، شنکولا، کنجوم جوت ، بڈا شگڈی لاہول اسپیتی میں 'لیڈی آف کیلانگ کی پہاڑی برف کی موٹی چادر سے ڈھک گئی ہے ۔
ضلع کننور کی پہاڑیوں میں برف باری کی وجہ سے ندی نالوں کی آبی سطح نیچے پہنچ گئی ہے،جس کی وجہ سے 'پن بجلی منصوبوں' کی بجلی پیداوار میں کمی واقع ہونے کا امکان ہے۔
برف باری کے ساتھ ہی لوگوں نے سردی کے آغاز کے سبب سردیوں کے کپڑے پہننے شروع کر دیئے ہیں۔ لوگ اپنے مویشیوں کے ساتھ پہاڑوں سے نشیبی علاقوں میں لوٹ رہے ہیں۔
