مرکزی حکومت کے زرعی قوانین کے خلاف گزشتہ 7 ماہ سے کسانوں کا احتجاج جاری ہے۔ کسان آج 'کھیتی بچاؤ، لوک تنتر بچاؤ' ڈے منارہے ہیں۔ اس سلسلے میں کسانوں نے راج بھونس کا گھیراؤ کرنے کی حکمت عملی بنائی ہے۔ ہریانہ کے مختلف اضلاع سے کسان آج چندی گڑھ کے لئے روانہ ہوگئے ہیں۔
پنچکولا پولیس نے تمام مظاہرین کو چندی گڑھ میں داخلے سے روکنے کے لئے شہر بھر کی تمام سرحدوں پر ناکہ بندی کردی ہے۔
ایم ڈی سی تھانے کے ایس ایچ او سشیل کمار نے بتایا کہ 'شہر کی سرحد پر پولیس کی بھاری تعیناتی کردی گئی ہے۔ اس کے علاوہ دوسرے اضلاع سے بھی پولیس طلب کی گئی ہے۔
یہ بھی پڑھیں: Farmers Protest: ملک کے کسان بڑے بحران سے گزر رہے ہیں: نریش ٹکیت
واضح رہے کہ '26 نومبر 2020 سے شروع ہوئی کسانوں کی تحریک ابھی ختم نہیں ہوئی ہے۔ سنیوکت کسان مورچہ اور مرکزی حکومت کے مابین متعدد دوروں کے مذاکرات ہوچکے ہیں، لیکن اب تک کسی بھی معاملے پر کوئی معاہدہ نہیں ہوسکا ہے۔
