ریاست ہریانہ کے ضلع نوح میوات سے گزرنے والا قومی شاہراہ 248A 'خونی شاہراہ' میں تبدیل ہو چکا ہے۔
دراصل روزانہ اس شاہراہ پر لوگ سڑک حادثے کا شکار ہو رہے ہیں۔ یہ روڈ نوح تک فور لین ہے جبکہ نوح سے آگے فور لین نہ ہونے کی وجہ سے روز بروز سڑک حادثے بڑھتے ہی جا رہے ہیں۔ حکومتیں بدلتی گئیں لیکن اس سڑک کی حالت نہیں بدلی۔
وہیں اس معاملے کو لے کر لوگوں کا کہنا ہے کہ 'انتخابات کے وقت ہر ایک پارٹی اسے انتخابی ایشو بناتی ہے لیکن حکومت بننے کے بعد اس شاہراہ کی سدھ کوئی نہیں لیتا۔ سیاسی رہنما ایک دوسرے پر الزام تراشی کرتے رہتے ہیں۔ اس دوران میوات کے لوگ سڑک حادثات میں اپنی جان گنواتے رہتے ہیں۔'
فی الحال ہریانہ میں بی جے پی اور جے جے پی مشترکہ طور پر برسر اقتدار ہے۔
جے جے پی رہنما طیب حسین گھاسیڑیا، کانگریس کے رکن اسمبلی آفتاب احمد پر اس شاہراہ کو لے کر الزام لگاتے ہیں۔اور خود سے پوچھے جانے پر محض یقین دہانی کرانا کافی سمجھتے ہیں۔
وہیں آفتاب احمد کا کہنا ہے کہ 'نوح تک کا کام مکمل ہو چکا تھا اس کے بعد حکومت بدل گئی پھر بی جے پی نے کچھ نہیں کیا۔ لاک ڈاؤن میں ٹریفک نہ ہونے کے سبب سڑک حادثے کم ہوئے لیکن لاک ڈاؤن کے بعد اموات کا سلسلہ پھر سے شروع ہوگیا ہے۔
انہوں نے بتایا کہ 'اس مرتبہ میوات کے لوگوں نے اپنے مطالبات کو منوانے کے لیے ٹویٹر پر مہم چلا رکھی ہے۔ ٹویٹر پر 'خونی روڈ کو فور لین کرو' کا ہیش ٹیگ کئی بار ٹرینڈ کر چکا ہے۔ لیکن ابھی حکومت کی جانب سے اس معاملے پر کوئی کارروائی نہیں کی گئی ہے۔
