روہتک میں لاٹھی چارج سے کسان ناراض، مہاپنچایت آج

ہریانہ کے ضلع روہتک میں کسانوں پر ہوئے لاٹھی چارج کو لے کر کسانوں میں شدید ناراضگی ہے۔ کسانوں نے اب نئی جنگ کا اعلان کیا ہے۔ کسانوں کی جانب سے مہاپنچایت کر کے نئی حکمت عملی بنانے کا اعلان کیا گیا ہے۔

روہتک میں کسانوں کی جانب سے وزیر اعلیٰ منوہر لال کھٹر کے دورے کی مخالفت کیے جانے پر کسان رہنما گرنام چڈھونی کا بیان سامنے آیا ہے۔ چڈھونی نے ویڈیو جاری کر کے اپنے ردعمل کا اظہار کیا ہے۔

چڈھونی نے لاٹھی چارج کی مذمت کرتے ہوئے کہا کہ روہتک میں ہمارے کسانوں پر پولیس والوں نے لاٹھیاں برسائیں جس میں ہمارے بہت سے کسان زخمی ہوئے۔

ساتھ ہی انہوں نے کہا کہ اتوار کے روز 10 بجے روہتک مکڑولی ٹول پر کسانوں کی مہا پنچایت کی جائے گی جس میں آگے کی حکمت عملی تیار کی جائے گی۔

چڈھونی نے کہا کہ پولیس نے جان بوجھ کر لاٹھی چارج کیا ہے۔

دراصل سنیچر کے روز وزیر اعلی منوہر لال بی جے پی کے ممبر پارلیمنٹ اروند شرما کے گھر پر ایک تعزیتی اجلاس میں پہنچے جہاں کسانوں نے ان کی سخت مخالفت کی۔ یہاں تک کہ پہلے سے طے شدہ جگہ پر ان کا ہیلی کاپٹر تک نہیں اتر سکا۔ اس کے علاوہ پولیس کو کسانوں پر لاٹھی چارج کرنا پڑا تھا۔ جس کے بعد وزیر اعلی نے اپنا گوہانا دورہ منسوخ کردیا ہے۔