آپ نے بے وفا سنم، بے وفا محبت اور بے وفا عاشق کے بارے میں تو سنا ہوگا لیکن کیا آپ نے کبھی بے وفا چائے والے کے بارے میں سنا ہے۔
نہیں تو آئیے! ہم آپ کو سونی پت کے مشہور بے وفا چائے والے سے روبرو کراتے ہیں جو عاشق جوڑے اور پیار میں دھوکہ کھائے ہوئے لوگوں کو الگ الگ قیمت پر چائے پلاتے ہیں۔
بے وفا چائے والا یہ دکان سونی پت کے گاندھی چوک پر واقع ہے۔ جہاں ہر کسی کے لیے الگ الگ قیمت پر چائے ملتی ہے۔ اگر آپ پیار میں دھوکہ کھائے شخص ہیں تو آپ کو یہاں چائے 25 روپے میں مل جائے گی لیکن اگر آپ کسی سے پیار کرتے ہیں یا پھر یوں کہیں کہ آپ ریلیشن شپ میں ہیں تو یہ بے وفا چائے والا آپ کو پورے پانچ روپے کا ڈسکاؤنت دے گا۔ یعنی آپ کو چائے 20 روپے میں مل جائے گی۔ وہیں ملک کی حفاظت کر رہے فوجیوں کے لیے چائے بالکل مفت ہے۔
ای ٹی وی بھارت سے خاص بات چیت کے دوران سونو عرف بے وفا چائے والے نے بتایا کہ 'اس نے یہ دکان محض تین ماہ قبل ہی کھولی ہے۔ لوگ اس کی دکان کو اس کے الگ نام کے سبب کافی پسند کر رہے ہیں۔ دکان میں الگ الگ لوگوں کے لیے چائے کی الگ الگ قیمت ہے، ساتھ ہی دکان میں کل 21 طرح کی چائے ملتی ہے۔ جیسے مسالا چائے، ادرک چائے، تندوری چائے اور فلیورڈ چائے۔'
وہیں دکان پر پہنچے کسٹمر نے بتایا کہ 'وہ دکان کے الگ نام کے سبب آتے ہیں۔ ساتھ ہی انہیں یہاں الگ الگ ذائقے کی چائے بھی ملتی ہے۔'
