Asif Murder: آصف قتل معاملے میں دو ملزم اور گرفتار

ریاست ہریانہ کے ضلع نوح میوات میں آصف (Asif Murder) قتل معاملے میں پولیس نے آج ایک اور بڑی کامیابی حاصل کی ہے۔ آج پولس نے آصف قتل معاملے میں پردیپ عرف پٹواری اور امت گاؤں کھیڑا خلیل پور کو گرفتار کرلیا ہے۔

ایس پی نوح کی قیادت میں ایس آئی ٹی ٹیم نے خفیہ معلومات کی بنیاد پر ان دونوں ملزمین کو گرفتار کیا ہے، جو قتل معاملے کے بعد سے ہی فرار تھے۔

دونوں ملزمین سے پوچھ تاچھ کی جا رہی ہے اور پوچھ گچھ کے بعد دونوں ملزمین کو قانوناً عدالت میں پیش کرکے قتل معاملے میں استعمال شدہ ہتھیاروں کی برآمدگی و پوچھ تاچھ کے لیے پولس ریمانڈ پر لیا جائے گا۔

غورطلب ہے کہ یہ قتل معاملہ 16 مئی 2021 کو پیش آیا تھا۔ آپسی رنجش کی بنا پر یہ معاملہ کھیڑا خلیل پور کے گاؤں آٹا فلائی ووڈ فیکٹری کے نزدیک پیش آیا تھا، جب کہ مقتول آصف کی لاش ننگلی گاؤں کے پاس ملی تھی۔

اس معاملے میں اب تک 11 ملزمین گرفتار ہو چکے ہیں۔ پولس ابھی بھی باقی ملزمین کی تلاش میں ہے۔

پولس کا کہنا ہے کہ سبھی ملزمین کو گرفتار کرکے جلد قانونی سزا دلوائی جائے گی۔