احمدآباد شہر کو آباد کرنے والے سلطان احمد شاہ کے دور کی کچھ روایتیں ایسی ہیں جس سے آج تک لوگوں کو فائدہ پہنچ رہا ہے۔ ان میں سے ایک ہے بادشاہ کے زمانے کا شاہی لنگر جو آج بھی سلطان احمد شاہ کے مقبرے کے باہر تقسیم کیا جاتا ہے۔
سلطان احمد شاہ نے اپنے دور میں کوئی غریب بھوکا نہ سوئے اس مقصد کے تحت لنگر کا اہتمام کیا تھا۔
گزشتہ 610 سالوں سے اس لنگر کا اہتمام کیا جا رہا ہے۔ یہ لنگر بہت خاص ہوتا ہے اس لنگر میں سات کلو کھچڑی ہر روز بنائی جاتی ہے۔ اسے صوفی کھانا بھی کہا جاتا ہے جسے بلا تفریق ہر مذاہب کے لوگ کھاتے ہیں۔
اس تعلق سے لنگر بنانے والے محمد یاسین کا کہنا ہے کہ 'میں گزشتہ 50 سالوں سے لنگر بنا رہا ہوں۔ بڑی تعداد میں لوگ ہر روز اس کھچڑی کو لینے آتے ہیں یہ لنگر ہر روز صبح 10 بجے سے تقسیم کیا جاتا ہے۔
یہ بھی پڑھیں: احمدآباد: شاہی جامع مسجد گجراتی طرز تعمیر کا شاہکار نمونہ
واضح رہے کہ پورے سال لنگر میں کھچڑی بنائی جاتی ہے لیکن سلطان احمد شاہ کے عرس کے موقع پر 160 کلو ذردہ بنا کر تقسیم کیا جاتا ہے۔ عرس کے موقع پر پورے گجرات سے عقیدت مند آتے ہیں۔
احمد شاہ بادشاہ کے مقبرے کی دیکھ ریکھ کا کام احمدآباد سنی مسلم وقف کمیٹی کرتی ہے اور عرس کے موقع پر شاہی لنگر کا پورا خرچ بھی احمدآباد سنی مسلم وقف کمیٹی اٹھاتی ہے۔
اس تعلق سے احمد شاہ بادشاہ کی درگاہ کے خادم احمد میاں شیخ نے بتایا کہ 'سنہ 1411 میں جب احمدآباد شہر کو بسایا گیا تب سے لے کر آج تک احمدآباد شہر میں لنگر نیاز تقسیم کیا جاتا ہے۔ احمدآباد سنی مسلم وقف کمیٹی نے اس رواج کو اب تک زندہ رکھا ہے۔'
