ریاست گجرات کے شہر احمدآباد ایئرپورٹ پر امریکی صدر ڈونلڈ ٹرمپ کا شاندار استقبال کیا گیا جہاں سے انہوں نے سابرمتی آشرم کا دورہ کیا، اور روڈ شو بھی کیا۔
یہاں ٹرمپ اور ان کی اہلیہ میلانیا ٹرمپ نے گاندھی جی کو خراج عقیدت پیش کیا، اور چرخہ چلایا۔
اس تعلق سے گاندھی آشرم کے سیکرٹری امرت مودی نے ای ٹی وی بھارت سے بات چیت کرتے ہوئے کہا کہ ڈونلڈ ٹرمپ کا دورہ بے حد اچھا رہا، انہوں نے مزید کہا کہ یہاں آ کر انہوں نے چرخہ چلایا، اور آزادی کے تعلق سے معلومات بھی حاصل کی۔
واضح رہے کہ یہ روایت ہے کہ جب کہ کوئی شخص گاندھی آشرم آتا ہے تو وہ مہاتما گاندھی کی جدوجہد یا ان کی شخصیت کے بارے میں لکھتا ہے، لیکن وزیٹربک میں بھی ڈونلڈ ٹرمپ نے وزیراعظم نریندر مودی کی تعریف ہی لکھی ہے۔
یاد رہے کہ ڈونلڈ ٹرمپ گاندھی آشرم سے نکلنے سے پہلے ایک وزیٹر بک میں وزیراعظم نریندر مودی کے لیے ایک پیغام لکھا جس میں انہوں نے لکھا ہے کہ 'میرے شاندار دورے کے لیے میرے عزیز دوست وزیراعظم نریندر مودی کا شکریہ'۔
