گجرات میں کورونا مریضوں کی تعداد میں مسلسل اضافہ ہو رہا ہے جس کے لئے بڑے پیمانے پر کورونا ٹیسٹ کیے جا رہے ہیں کیونکہ لوگوں کو خبر نہیں ہے کہ وہ کس کے رابطے میں آنے سے کورونا پوزیٹیو ہو جا رہے ہیں، ایسے میں گجرات حکومت نے کورونا ٹیسٹ کے حوالے سے بڑا اعلان کیا ہے جس کے تحت ریاستی حکومت نے کورونا ٹیسٹ کے لیے نجی لیباریٹریز کی قیمت طئے کی ہے۔
اس تعلق سے نائب وزیراعلی اور گجرات کے وزیر صحت نتن پٹیل نے اعلان کرتے ہوئے کہا کہ اب گجرات میں نجی لیباریٹری میں ہونے والا کورونا ٹیسٹ محض 25 سو روپے میں لیا جائے گا۔ صرف یہی نہیں اگر آپ کو گھر میں ٹیسٹ کرانا ہے تو اس کے لیے تین ہزار روپے وصول کیے جائیں گے۔ اگر کوئی نجی لیباریٹری اس سے زیادہ رقم وصول کرتی ہے تو اس کا لائسنس منسوخ کر دیا جائے گا۔
انہوں نے شہریوں سے اپیل کی ہے کہ وہ اپنا کورونا ٹیسٹ سرکاری اسپتال میں ہی کروائیں کیونکہ ہر روز گجرات کے سرکاری لیباریٹری میں تقریباً چار ہزار سے ساڑھے چار ہزار کے ٹیسٹ مفت میں کیے جا رہے ہیں۔
واضح رہے کہ احمدآباد میڈیکل ایسوسی ایشن نے اس معاملے پر وزیر اعلیٰ اور نائب وزیراعلی نتن پٹیل کو ایک تجویز بھیجی تھی جس میں مطالبہ کیا گیا تھا کہ گجرات میں کورونا ٹیسٹ کی قیمتوں کو کم کیا جائے اور کورونا ٹیسٹ کا چارج طئے کیا جائے تاکہ عام لوگ آسانی سے کورونا کا ٹیسٹ کروا سکے۔
