گجرات ضمنی انتخابات کے تعلق سے ڈیموکریٹک مائنوریٹی فورم کے کنوینر دانش قریشی نے کہا کہ ایک طرف کورونا وائرس جیسے وبائی مرض سے پورا ملک پریشان ہے، اس وبا میں لوگوں کے حالات خستہ ہو چکے ہیں۔ کورونا وائرس کے قہر کے باوجود انتخابات کا اعلان کیا گیا ہے، ایسے میں مجھے لگتا ہے کہ ایسی جلد بازی کرنے کی کوئی ضرورت نہیں تھی ۔جب تک حالات معمول پر نہیں آتے تب تک انتخابات کرانے کی ضرورت نہیں تھی۔
انہوں نے مزید کہا کہ ایک طرف آپ سوشل ڈیسٹنسنگ کی بات کرتے ہیں، وہیں دوسری جانب آپ انتخابات کروا رہے ہیں۔ ایسے میں الیکشن کرانے سے ووٹروں کی تعداد کم ہونے کا امکان ہے۔ ایک تندرست جمہوریت کے لیے ووٹنگ کی شرح زیادہ سے زیادہ ہونا ضروری ہے لیکن اس سال کورونا کا اثر ان انتخابات پر صاف نظر آئے گا اور جس کا اثر نتائج پر بھی پڑ سکتا ہے۔
واضح رہے کہ گزشتہ روز الیکشن کمیشن آف انڈیا نے گجرات میں 8 نشستوں پر ہونے والے ضمنی انتخابات کے تاریخوں کا اعلان کیا تھا۔اس کے ساتھ ہی الیکشن کمیشن نے ملک بھر میں کل 56 اسمبلی نششتوں پر ضمنی انتخابات کا اعلان کیا ہے، جس میں گجرات اسمبلی کی 8 نشستوں پر تین نومبر کو ضمنی انتخابات کے لیے ووٹ ڈالے جائیں گے اور 10 نومبر کو اس کے نتائج کا اعلان کیا جائے گا۔
الیکشن کمیشن کے مطابق گجرات اسمبلی کی 8 اسمبلی نشستوں کے لیے تمام امیدوار 9 سے 16 اکتوبر تک اپنے پرچہ نامزدگی داخل کر سکتے ہیں اور 19 اکتوبر کو فارم واپس لینے کی آخری تاریخ طے کی گئی ہے، انتخابات کی تاریخوں کا اعلان ہوتے ہی گجرات میں ضابطہ اخلاق نافذ ہوگیا ہے ۔
