واگھانی کے بیٹے مِیت اپنے آبائی شہر بھاونگر کے سوامی وویکا نند کالج آف کمپیوٹر سائنسز میں بیچلر آف کمپیوٹر ایپلی کیشنز یعنی بی سی اے کے دوسرے سیمسٹر کے طالب علم ہیں۔
وہ گذشتہ شام ایم جے کالج آف کامرس میں امتحان دیتے وقت مبینہ طور پر نقل کرتے ہوئے پکڑے گئے۔
انہیں کالج کے پرنسپل کانجی بٹالیا نے پکڑا اور اس بات کی اطلاع بھاونگر یونیورسٹی کے وائس چانسلر کو دی۔
بتایا جاتا ہے کہ پہلے اس معاملے کو دبانے اور رفع دفع کرنے کی کوشش کی گئی لیکن بٹالیا کی سختی کی وجہ سے معاملے کو متعلقہ ایگزامنیشن کمیٹی کو سونپ دیا گیا۔
اس واقعہ کے بعد واگھانی نے میڈیا کو بتایا کہ ایسے معاملے میں جو کارروائی عام طلبا کے ساتھ کی جاتی ہے، ویسے ہی ان کے بیٹے کے ساتھ بھی ہونا چاہئے۔
انہوں نے کہا کہ حالانکہ یہ معاملہ ابھی کمیٹی کے پاس ہے لیکن ان کے خاندان نے یہ فیصلہ کیا ہے کہ آج سے مِیت امتحان میں شامل نہیں ہوں گے۔
اس دوران انتخابی ماحول کے دوران پیش آئے اس واقعہ کو بی جے پی کے لیے شرمنا ک قرار دیا جا رہا ہے۔
کانگریس کے ایک رہنما نے کہا کہ یہ گجرا ت میں بی جے پی حکومت کی تعلیم اور امتحان کی پالیسی میں بدعنوانی کی واضح مثال ہے اور اس سے یہ واضح ہو گیا ہے کہ خود کو چوکیدار بتانے والے بی جے پی سے منسلک رہنما اصل میں کیا ہیں۔
