امریکی صدر ڈونلڈ ٹرمپ 24 فروری کو صبح 11 بجکر 55 منٹ پر احمدآباد ہوائی اڈہ پہنچ جائیں گے جہاں ان کا شاندار استقبال کیا جائے گا۔
اس کے بعد وزیر اعظم نریندر مودی اور ڈونلڈ ٹرمپ اپنی اہلیہ میلانیا ٹرمپ کے ساتھ ایک روڈ شو میں حصہ لیں گے۔ اس 22 کلو میٹر لمبے روڈ شو کی شروعات احمدآباد ہوائی اڈہ سے ہوگی اور سب سے پہلے ہوائی اڈہ سے سیدھا ٹرمپ اور وزیر اعظم نریندر مودی بھی گاندھی آشرم جائیں گے جہاں ان کا شاندار استقبال کیا جائے گا، ساتھ ہی انہیں گاندھی جی پر مبنی ایک کتاب بطور تحفہ دی جائے گی۔
گاندھی آشرم میں موجود گاندھی کے مورتی کو سوت کی مالا خود ٹرمپ پہنائیں گے اور گاندھی جی کا چرخہ بھی چلا سکتے ہیں۔ ساتھ ہی گاندھی آشرم کے نمائش ہال میں جائیں گے اور ملک کی آزادی میں کس طرح سے گاندھی جی اور گاندھی آشرم کا حصہ رہا ہے، اس تعلق سے انہیں معلومات بھی فراہم کی جائے گی۔ اس کے علاوہ انہیں ہلکا پھلکا ناشتہ بھی گاندھی آشرم میں کرایا جائے گا جس میں خاص طور سے کھمن، سموسا، ڈرائی فوڈ، جوس وغیرہ ہوں گے۔
امریکی صدر ڈونلڈ ٹرمپ کے استقبال کے لیے گاندھی آشرم پوری طرح تیار ہے، لہذا یہاں پر سخت سکیورٹی کے انتظامات کیے گئے ہیں۔
