اس مہم میں گجرات کانگریس کمیٹی کے اراکین نے بڑھ چڑھ کر حصہ لیا اور کسانوں کے ساتھ ہو رہی نا انصافی پر سوشل میڈیا، فیس بک، ٹوئٹر پر جم کر اپنی ناراضگی ظاہر کی ہے۔
اسپیک اپ فار فارمرز (کسانوں کے لیے آواز اٹھاؤ) مہم کے تحت سوشل میڈیا پر اپنی ویڈیو شیئر کرتے ہوے گجرات کانگریس کمیٹی کے صدر امت چاوڑا نے کہا کہ ملک میں ایک بار پھر مودی حکومت کا کسان مخالف چہرہ سامنے آیا ہے، مودی حکومت جب سے برسر اقتدار آئی تب سے یہ حکومت کسانوں کو کمزور کرنے کی سمت میں کام کر رہی ہے۔
چاوڑا نے یہ بھی کہا کہ 'اب پھر پارلیمنٹ میں مودی حکومت نے ایسے بل پاس کروائیں ہیں جو جمہوریت کو ختم کرتے ہیں اور آنے والے دنوں میں کسانوں کو بہت بڑے نقصان کا سامنا کرنا پڑ سکتا ہے۔ جو کسان اپنے کھیتوں کے مالک ہیں آنے والے دنوں میں وہ اپنے ہی کھیت میں مزدور بن کر رہ جائیں گے۔
انھوں نے یہ بھی کہا کہ یہ کسانوں کے مستقبل کا سوال ہے اور کسانوں کے حقوق کی لڑائی ہے اس لیے سب مل کر اسپیک اپ فار فارمرز مہم کے ذریعے کسانوں کے حقوق کی لڑائی بلند کر رہے ہیں۔
کانگریس رہنما ہاردک پٹیل نے کہا کہ گزشتہ تین دنوں سے کسان سڑکوں پر اتر کر بی جے پی حکومت کی غلط پالیسیوں کے خلاف احتجاجی مظاہرہ کر رہے ہیں، پارلیمنٹ میں جس طرح سے زرعی بل 2020 کے نام پر کالا قانون پاس کیا گیا ہے اس سے کسان پریشان ہیں۔
انھوں نے یہ بھی کہا کہ پورے ملک کے کسان ایک ہی بات کا مطالبہ کر رہے ہیں کہ زرعی بل کو واپس لیا جائے یا پھر اس بل کے تحت کسانوں کے بنیادی حق اور منڈی کے حقوق کی بات بھی کی جائے، زرعی بل صرف کسانوں کو برباد کرنے کے لیے ہیں کسانوں کے لیے سب کو ساتھ مل کر لڑنے کی ضرورت ہے ان کے حقوق کے لیے ہمیں بولنے کی ضرورت ہے۔
