گجرات میں بلدیاتی انتخابات قریب ہونے کی وجہ سے گجرات کی سیاست عروج پر ہے۔
اس دوران گجرات کی سیاست میں پہلی بار آل انڈیا مجلس اتحاد المسلمین نے دستک دی ہے۔
اس تعلق سے آج اے آئی ایم آئی ایم گجرات کے صدر صابر کابلی نے ای ٹی وی بھارت کے ساتھ اپنے خصوصی گفتگو میں کہا کہ 'گجرات کا اقلیتی طبقہ سالوں سے ایم آئی ایم پارٹی کی راہ دیکھ رہا تھا۔ انہوں نے کہا کہ بڑی تعداد میں دیگر طبقے کے لوگ اس پارٹی سے جڑ رہے ہیں۔
انہوں نے بھارتیہ ٹرائیبل پارٹی کے صدر چھوٹو بھائی وساوا کے ساتھ اپنے اتحاد پر گفتگو کرتے ہوئے بتایا کہ چھوٹو بھائی وساوا کے ٹرائیبل علاقے میں کافی مسائل ہیں جس کے حل کے لئے یہ اتحاد کیا گیا ہے۔
وہیں، اے آئی ایم آئی ایم پارٹی کو بی جے پی کی بی ٹیم کہنے والوں کو صابر کابلی والا نے کہا کہ 'بی جے پی کانگریس دونوں ایک ہیں۔ جب بھی یہاں کوئی دوسرا متبادل آتا ہے تو یہ دونوں ایک ہو کر اسے ہرانے کی کوشش کرتے ہیں۔ اب یہ لوگ بوکھلا گئے ہیں لیکن ہم گجرات میں تیسرے فرنٹ کو مضبوط کریں گے اور دلت مسلم قبائلی ایک ہو کر الیکشن لڑیں گے۔
