پان تو آپ نے بہت سے کھائے ہوں گے لیکن کیا کبھی آپ نے جلتا ہوا پان کھایا ہے؟ آپ سوچ رہے ہوں گے کہ ہم یہ کس طرح کی بات کر رہے ہیں لیکن گجرات کے شہر احمدآباد میں ایک پان شاپ پر ایسا ہی پان فروخت ہوتا ہے جسے کھانے کے لیے شوق کے ساتھ ساتھ ہمت بھی ہونی چاہیے کیونکہ یہ پان کوئی عام پان نہیں بلکہ ایسا پان ہے جس میں آگ لگی ہوئی ہوتی ہے۔ اسے فائر پان Fire Panکہا جاتا ہے۔
احمدآباد میں قریشی برادری کی شادی میں عارف والے نے اپنا پان اسٹال لگایا تھا جس میں انہوں نے مختلف اقسام کے پان رکھے تھے انہیں میں فائر پان بھی شامل تھا جو مہمانوں کی توجہ کا مرکز رہا۔
اس تعلق سے عارف شیخ نے بتایا کہ گزشتہ 30 برسوں سے وہ پان کا کاروبار کر رہے ہیں۔ گزشتہ روز انہیں شادی کی تقریب میں پان کا اسٹال لگانے کا موقع ملا جہاں انہوں نے لوگوں کو فائر پان، وینیلا، اسٹرابیری چاکلیٹ، سنگھاڑا اور میٹھا پان کھلایا ہے۔
واضح رہے کہ پان پرانے زمانے سے ہی کھایا جاتا رہا ہے لیکن وقت کے ساتھ ساتھ اس کی نئی نئی اقسام اور ذائقے بھی سامنے آتے گئے۔
ایسے میں خاص طور سے سے فائر پان ان دنوں توجہ کا مرکز بنا ہوا ہے جس کے بنانے کا انداز بھی جداگانہ ہے۔ اس میں الائچی، سُپاری، ماؤتھ فریشنر، گلقند وغیرہ ڈالے جاتے ہیں۔ اس کے بعد اس میں لونگ ڈال کر لائٹر سے اس میں آگ لگائی جاتی ہے اور کھانے والے کے منہ میں ڈال دیا جاتا ہے
