مرکز کے زیر انتظام کشمیر کے وسطی ضلع گاندربل میں پولیس نے ایک اور منشیات فروش کو گرفتار کرنے کا دعویٰ کیا ہے-
اطلاعات کے مطابق گاندربل پولیس نے ایک خفیہ اطلاعات موصول ہونے پر سفاپورہ علاقے میں کئی جگہوں پہ ناکہ لگا کر منشیات فروش کو رنگے ہاتھوں گرفتار کرنے کا منصوبہ بنایا تھا جو آج بڑی محنت اور مشقت کے بعد پورا ہو پایا۔
گاندربل پولیس کا دعویٰ ہے کہ انہوں نے ایسے کئی منشیات فروشوں کو گرفتار کیا جو تجارت کی آڑ میں ضلع کے مختلف علاقوں میں منشیات فروخت کررہے تھے-
پولیس کے مطابق ڈرگس (منشیات) سپلائی کرنے والے یہ ملزم حجیں علاقے سے تعلق رکھتا ہے جو آج صفاپورہ میں منشیات فروخت کرنے کے غرض سے آیا تھا تاہم پولیس کی بروقت کاروائی سے ملزم پولیس کی گرفت میں آیا۔
اُنہوں نے کہا یہ ملزم بڑے پیمانے پر نوجوانوں میں منشیات فروخت کر کے نوجوان نسل کو تباہی کی جانب لے جا رہا تھا-
ادھر مقامی لوگوں نے پولیس کی اس کارروائی کو سراہتے ہوئے پولیس سے گزارش کی کہ وہ اس عمل کو جاری رکھیں-
واضح رہے کہ پولیس نے ضلع میں پہلے بھی کئی منشیات فروشوں کو گرفتار کر کے انکے خلاف کاروائی کی ہے۔
گاندربل کے ایس ایس پی خلیل احمد پوسوال نے کہا کہ وہ ضلع میں نشے کا خاتمہ کرنے کے لیے ہر ممکن کوشش کریں گے۔
انہوں نے ضلع کی عوام سے گزارش کی کہ وہ ڈرگ مافیا کے خاتمے کے لیے پولیس کے ساتھ تعاون کریں-
