وسطی کشمیر کے ضلع گاندربل میں بھی بتیسویں روڑ سیفٹی مہینے کے تحت ایک آگہی مہم کا آغاز کیا گیا جس میں ڈی سی گاندربل نے ہری جھنڈی دکھا کر گاڑیوں کو روانہ کیا۔
پیر کو ڈپٹی کمشنر گاندربل شفقت اقبال نے ایس ایس پی گاندربل، اے ڈی سی گاندربل، اے آر ٹی او کی موجودگی میں منی سیکریٹریٹ گاندربل سے 32 ویں روڈ سیفٹی مہینے کے تحت آگہی ریلی کو ہری جھنڈی دکھا کر روانہ کیا۔
یہ گاڑیاں ضلع کے مختلف علاقوں سے گزر کر عوام کو ٹریفک قوانین پر عمل کرنے اور خلاف ورزی کرنے پر عائد کیے جانے والے جرمانے اور دیگر کارروائیوں سے متعلق جانکاری فراہم کریں گی۔
قابل ذکر ہے کہ اس مرتبہ روڑ سیفٹی آگہی مہم، 18جنوری سے 17فروری، ایک مہینے تک جاری رہے گی، اس سے قبل یہ پروگرام ہفتہ وار بنیادوں پر ہوا کرتا تھا۔
اس موقع پر ضلع گاندربل کے اے آر ٹی او نے کہا کہ ضلع میں ٹریفک قوانین پر عمل پیرا ہونے کی اہمیت کے بارے میں لوگوں کو حساس بنانے کی کوشش کی جائے گی۔
انہوں نے مزید کہا کہ ڈرائیوروں خاص کر موٹر سائکل چلانے والے نوجوانوں حتی کہ پیدل چلنے والے افراد کو بھی ٹریفک قوانین کی پاسداری کرنے کی تلقین کی جائے گی۔
اے آر ٹی او نے کہا کہ مہینہ بھر چلنے والی اس آگہی مہم میں سڑکوں کی حفاظت سے متعلق معلومات کو فروغ، ٹریفک قوانین کے بارے میں آگہی کے علاوہ آگاہی کیمپوں، ڈرائیوروں کے لئے میڈیکل کیمپ، آگاہی ریلیاں اور پینٹنگ مقابلوں کا بھی انعقاد کیا جائے گا۔
