نمائندے کے مطابق یہ سانحہ ضلع ڈوڈہ کے پیاکل علاقے میں ٹھاٹھری سے کلہوترن جانے والی سڑک پر پیش آیا۔
مہلوکین کی شناخت شہزاد احمد (27) ساکن چرولہ اور محمد عارف ساکن کشتواڑ کے بطور ہوئی ہے۔
دریں اثنا ٹھاٹھری کے سب مجسٹریٹ محمد انور بانڈے نے کہا کہ اس واقعے کی خبر ملتے ہی کارروائی شروع کی گئی اور ہفتہ کی صبح قریب ساڑھے پانچ بجے ملبے کے نیچے دبے دونوں افراد کی لاشوں کو بر آمد کیا گیا۔
اُن کے مطابق ٹرک کچے راستے پر مٹی میں پھنس گیا اور دونوں افراد ملبہ ہٹانے کی غرض سے گاڑی سے باہر آگئے تھے۔جہاں مٹی کا تودا گر آیا اور دونوں افراد کو ٹرک سمیت اپنی زد میں لیا۔
انہوں نے مزید کہا کہ سڑک سے ملبے کو ہٹایا گیا ہے اور دونوں کی لاشوں کو قانونی رسومات کے لیے ہسپتال منتقل کیا گیا ہے۔
