مغل شہنشاہ اکبر اور بھدرواہ کے بادشاہ ناگپال کے مابین تاریخی ملاقات کی یاد میں تین دن تک منایا جانے والا میلہ پٹھ منگل کے روز اختتام پذیر ہوا۔
جموں و کشمیر میں پہاڑی ضلع ڈوڈہ کے بھدرواہ علاقے میں سالانہ پٹھ میلہ تین روزہ مختصر تقاریب کے بعد اختتام پذیر ہوا۔
رواں برس عالمی وبا کورونا وائرس کے چلتے میلے میں صرف مقامی عقیدت مندوں کو شرکت کرنے کی اجازت دی گئی تھی۔ پٹھ میلہ کیلاش یاترا کے بعد ناگ پنچمی کے موقع پر شروع ہوتا ہے۔
مقامی باشندوں کے مطابق بھدرواہ کے بادشاہ ناگپال اور مغل شہنشاہ اکبر کی ملاقات اور اکبر بادشاہ کی جانب سے تحفے تحائف دیے جانے کے بعد سے اب تک پٹھ میلہ صدیوں سے منعقد کیا جا رہا ہے۔
میلہ پٹھ میں بھدرواہ کے درگا مندر میں آخری روز ایک بہت بڑے پروگرام کا اہتمام کیا جاتا ہے جس میں منفرد قسم کا رقص اور یہاں کی مقامی زبان میں گانا گا کر کیا جاتا ہے۔
رواں برس انتظامیہ کی جانب سے عالمی وبا کورونا وائرس کے چلتے عوام کو رہنمایانہ خطوط کی پاسداری کرنے کی تلقین کے باوجود میلہ پٹھ کے دوران لوگوں کی بھاری بھیڑ دیکھنے کو ملی، اگر چہ پولیس کی جانب سے سماجی فاصلہ سمیت دیگر رہنمایانہ خطوط کو برقرار رکھنے کے پختہ انتظامات کیے گئے تھے تاہم ہجوم میں رہنما خطوط کی مکمل خلاف ورزیاں پائی گئیں۔
