ڈوڈہ میں کوروناوائرس کے تعلق سے جاری ایس او پیز پر عمل کرانے کے لئے انتظامیہ، طبی عملہ کے علاوہ ٹریفک پولیس بھی پوری مستعدی سے کام کر رہی ہے، خلاف ورزی کرنے والوں کے خلاف سخت کاروائی بھی کی جا ررہی ہے۔
علاوہ ازیں جموں و کشمیر بینک جانے والے افراد و دیگر کی جگہ جگہ کووڈ۔19 ٹیسٹ کی جا رہی ہے۔ اگر چہ ضلع میں دیگر اضلاع کی طرح ہی دکانیں کھولنے کے لئے مخصوص دِن مقرر کئے گئے ہیں لیکن لوگوں کی آمد رفت میں کوئی کمی نہیں دیکھنے کو مل رہی ہے۔
اس حوالے سے اے سی آر ڈوڈہ قیصر احمد بھوانی نےبتایا کہ' محکمہ مال، ٹریفک پولیس اور محکمہ بلدیہ کے اہلکار کووڈ۔19 کے رہنما خطوط پر عمل کرنے کے لئے عوام پر زور دے رہے ہیں۔
اُنہوں نےبتایا کہ' کافی دِنوں سے جموں و کشمیر بینک برانچ کے باہر لوگوں کی بھیڑ جمع ہونے کی خبریں موصول ہو رہی تھیں اور یہ بھیڑ وائرس پھیلنے کی وجہ بن سکتی تھی۔ اسی لئے بینک جانے والے افراد کا ٹیسٹ کیا جا رہا ہے۔ جس میں دو مثبت معاملات سامنے آئے ہیں۔ کووڈ-19مثبت افراد کو ہوم آ ئسولیشن میں رکھا گیا'۔
اُنہوں نے عوام سے اپیل کرتے ہوئے کہا کہ' اس مہلک وائرس کی روک تھام کے لئے انتظامیہ کو تعاون دیں اور غیر ضروری گھروں سے باہر نہ نکلیں'۔
