جموں و کشمیر کی خصوصی دفعہ 370 سمیت سنہ 2023 کے اہم عدالتی فیصلے

Year ender 2023: سنہ 2023 میں سپریم کورٹ کی جانب سے ایسے اہم امور پر فیصلے سنائے گئے ہیں جن کے عوامی زندگی پر گہرے اثرات مرتب ہوئے ہیں اور ان کے اثرات مسقبل میں ہوتے رہیں گے، جو ہزاروں لوگوں کے لیے اہم تھے، اور انصاف و عدلیہ پر لوگوں کے اعتماد کو زندہ رکھنے کے لیے بھی اہم تھے۔ جن میں جموں و کشمیر کی خصوصی دفعہ 370، ہم جنس پرست شادی، طلاق اور 26 ہفتوں کے حمل سے متعلق فیصلے قابل ذکر ہیں۔ Major Supreme Court judgments in 2023

نئی دہلی: سنہ 2023 میں سپریم کورٹ کی جانب سے سنائے گئے اہم 10 فیصلوں کی فہرست جنہیں خصوصی طور پر یاد کیا جائے گا کہ یہ فیصلے سنہ 2023 میں سپریم کورٹ کی جانب سے کیے گئے تھے۔

1. آرٹیکل 370: جموں و کشمیر کی خصوصی دفعہ

چیف جسٹس آف انڈیا ڈی وائی چندرچوڑ کی قیادت میں سپریم کورٹ کے پانچ ججز کی آئینی بنچ نے آرٹیکل 370 کو منسوخ کرنے کے مرکزی حکومت کی جانب سے 2019 میں لیے گئے فیصلے کو برقرار رکھا۔ اس دفعہ کی وجہ سے سابقہ ریاست جموں و کشمیر کو خصوصی درجہ دیا گیا تھا۔ پانچ ججوں نے متفقہ طور پر کہا کہ آرٹیکل 370 ایک عارضی شق ہے، لیکن سپریم کورٹ نے مرکز کو جموں و کشمیر کی ریاست کا درجہ بحال کرنے اور ستمبر 2024 تک وہاں انتخابات کرانے کی ہدایت دی ہے۔ عدالت نے لداخ کو مرکز کے زیر انتظام علاقہ بنانے کے فیصلے کو بھی آئینی طور پر درست قرار دیا۔ سپریم کورٹ نے یہ بھی کہا کہ آئین کے پیرا 2 (جموں و کشمیر کے لیے درخواست) آرڈر، 2019 جس کے ذریعے آئین کے آرٹیکل 367 میں ترمیم کر کے آرٹیکل 370 میں ترمیم کی گئی تھی، الٹرا وائرس تھی کیونکہ تشریحی شق کو ترمیم کے لیے استعمال نہیں کیا جا سکتا۔ واضح رہے کہ مرکز کی جانب سے دفعہ 370 کی منسوخی کے خلاف سپریم کورٹ میں کئی عرضیاں دائر کی گئیں تھیں اور کشمیر کی عوام کو امید تھی کہ سپریم کورٹ کی جانب سے مثبت فیصلہ آئے گا۔

• 2 ہم جنس شادی:

اکتوبر میں سپریم کورٹ کے پانچ ججز پر مشتمل آئینی بنچ نے ہم جنس شادی کو قانونی حیثیت دینے کی درخواستوں کی میراتھن سماعت کے مہینوں بعد تین دو کی اکثریت سے فیصلہ دیا کہ یہ ریاست پر منحصر ہے کہ وہ اس بات کو یقینی بنائیں کہ درخواست گزار کیا چاہتے ہیں۔ چیف جسٹس آف انڈیا ڈی وائی چندرچوڑ کی سربراہی میں بنچ نے ہم جنس شادی کو قانونی تسلیم کرنے سے انکار کرتے ہوئے کہا کہ شادی کا کوئی "نااہل حق" نہیں ہے سوائے ان لوگوں کے جو قانون کے ذریعہ تسلیم شدہ ہیں۔ آئینی بنچ کے متفقہ فیصلے میں کہا گیا کہ شادی کا کوئی بنیادی حق نہیں ہے۔ جسٹس سنجے کشن کول نے ہم جنس شراکت کو تسلیم کرنے کی وکالت کی، اور ہم جنس پرست افراد کے حقوق کے تحفظ کے لیے انسدادِ امتیازی قوانین پر زور دیا۔ نظرثانی کی درخواستوں میں عدالت عظمیٰ سے اپنے فیصلے پر نظر ثانی کرنے کا مطالبہ کیا گیا ہے۔

3 چھبیس ہفتوں کا حمل:

چیف جسٹس آف انڈیا کی قیادت میں سپریم کورٹ کے تین ججز کی بنچ نے ایک شادی شدہ خاتون کی درخواست کو مسترد کر دیا جس نے اپنی بیماری کی وجہ سے 26 ہفتوں سے زیادہ کا حمل ختم کرنے کی درخواست کی تھی۔ عدالت عظمیٰ نے کہا کہ حمل کی طوالت 24 ہفتے سے تجاوز کر چکی ہے، جس کی وجہ سے حمل کے طبی خاتمے کی اجازت نہیں دی جا سکتی۔ عدالت عظمیٰ نے کہا کہ ماں کو فوری طور پر کوئی خطرہ نہیں ہے اور یہ جنین کی خرابی کا معاملہ نہیں ہے۔

• 4 راہل گاندھی بہ حیثیت رکن پارلیمنٹ:

اگست میں سپریم کورٹ نے کانگریس لیڈر راہل گاندھی کو ایک بڑی راحت دیتے ہوئے ان کے مودی کنیت کے تبصرہ پر ہتک عزت کے مقدمے میں راہل گاندھی کی سزا پر روک لگا دی۔ گاندھی نے عدالت عظمیٰ سے کہا تھا کہ وہ اپنے اس ریمارکس کے لیے کوئی معافی نہیں مانگیں گے کہ کیوں کہ ملک سے فرار ہونے والے تمام چوروں کے نام کے ساتھ لفظ 'مودی' جڑا ہوا ہے۔ راہل گاندھی نے زور دیا کہ ان کی سزا کو زیر التواء اپیل پر روک دیا جائے، جس سے وہ لوک سبھا کی جاری اجلاس میں حصہ لے سکیں گے۔ عدالت عظمیٰ نے کہا تھا: ’’اس میں کوئی شک نہیں کہ اپیل کنندہ کے مبینہ بیانات اچھے نہیں ہیں۔ عوامی زندگی میں ایک شخص سے توقع کی جاتی ہے کہ وہ عوام کے درمیان تقریر کرتے وقت کچھ حد تک تحمل کا مظاہرہ کرے۔ تاہم جیسا کہ اس عدالت نے مندرجہ بالا توہین عدالت کی کارروائی میں اپیل کنندہ کے حلف نامہ کو قبول کرتے ہوئے مشاہدہ کیا ہے، یہاں اپیل کنندہ کو عوامی تقریر کرتے وقت زیادہ محتاط رہنا چاہیے تھا۔ واضح رہے کہ راہل گاندھی کے اس معاملے پر بھی پورے ملک کی نظریں جمی ہوئی تھی کہ کیا سپریم کورٹ کی جانب سے راہل گاندھی کی پارلیمنٹ کی رکنیت کو ختم کیا جاتا ہے؟ اور ان کی سزا کو برقرار رکھا جاتا ہے؟۔

• 5 مہاراشٹر کی سیاست:

سپریم کورٹ کے پانچ ججوں کی بنچ نے مہاراشٹر کے گورنر کے اس وقت کے وزیر اعلیٰ ادھو ٹھاکرے کو اپنی پارٹی میں بحران کے تناظر میں فلور ٹیسٹ کا سامنا کرنے کے فیصلے کو "غیر منصفانہ" قرار دیا۔ عدالت نے سیاسی پارٹی اور قانون ساز پارٹی کے اختیارات کے درمیان یہ کہتے ہوئے تفریق بھی کی کہ صرف ایک سیاسی جماعت ہی ایوان میں وہپ اور پارٹی کے لیڈر کا تقرر کر سکتی ہے۔ عدالت نے اس دوران فیصلہ میں کہا تھا کہ اس وقت کے وزیراعلی ادھو ٹھاکرے کو استعفی نہیں دینا چاہیے تھا۔ واضح رہے کہ شیو سینا لیڈر ایکناتھ شنڈے نے متعدد اراکین اسمبلی کے ساتھ شیو سینا سے بغاوت کرتے ہوئے بی جے پی کے ساتھ اتحاد کرکے مہاراشٹر میں حکومت قائم کی تھی۔ اور یہ معاملہ سپریم کورٹ تک جا پہنچا تھا۔

• 6 طلاق:

عدالت عظمیٰ کے پانچ ججوں پر مشتمل آئینی بنچ نے کہا کہ وہ شادی کے ناقابل تلافی خرابی کی بنیاد پر شادی کو تحلیل کر سکتا ہے، اور مزید کہا کہ وہ آئین کے آرٹیکل 142 کے تحت اسے دی گئی خصوصی طاقت کو استعمال کر سکتا ہے، تاکہ دونوں کے درمیان مکمل انصاف کیا جا سکے۔ عدالت عظمیٰ نے کہا کہ باہمی رضامندی سے طلاق کے لیے 6 ماہ کے لازمی انتظار کی مدت شرائط کے ساتھ ختم کی جا سکتی ہے۔

• 7 دہلی لیفٹیننٹ گورنر بمقابلہ عآپ حکومت:

چیف جسٹس آف انڈیا کی قیادت میں پانچ ججز کی ایک آئینی بنچ نے فیصلہ دیا کہ دہلی حکومت کے پاس پولیس، پبلک آرڈر، اور لینڈ ایڈمنسٹریشن سے متعلق معاملات کو چھوڑ کر خدمات کے انتظامات سے متعلق قانون سازی اور انتظامی اختیارات ہیں۔ تاہم مرکز نے سپریم کورٹ کے فیصلے کو پلٹنے کے لیے قومی دارالحکومت علاقہ دہلی (ترمیمی) بل، 2023 کو پیش کیا۔ اس بل کو لوک سبھا اور راجیہ سبھا دونوں نے منظور کیا تھا۔ ہندوستان کے صدر نے سپریم کورٹ کے حکم کو پلٹتے ہوئے اس بل کو منظوری بھی دے دی۔

• 8 نوٹ بندی:

سنہ 2023 کے آغاز میں سپریم کورٹ نے ایک بڑے فیصلے میں وزیراعظم نریندر مودی کی قیادت والی حکومت کے 2016 کے نوٹ بندی کے فیصلہ کو درست قرار دیا۔ عدالت عظمیٰ نے 500 اور 1000 روپے کے نوٹوں کو ختم کرنے کے مرکز کے اقدام کو چیلنج کرنے والی 58 درخواستوں کو چار۔ ایک کی اکثریت کے ساتھ خارج کر دیا۔ عدالت عظمیٰ نے کہا کہ ’’معاشی پالیسی کے معاملات میں بہت تحمل کا مظاہرہ کرنا ہوگا اور عدالت اپنے فیصلے پر عدالتی نظرثانی کے ذریعے ایگزیکٹو کی دانشمندی کی جگہ نہیں لے سکتی‘‘۔ واضح رہے کہ سنہ 2016 نومبر میں مرکزی حکومت کی جانب سے نوٹ بندی کا اعلان کیا گیا تھا۔ رات 8 بجے وزیراعظم مودی نے اعلان کیا ہے کہ 500 اور 1000 کے نوٹ کی قانونی حیثیت ختم کردی گئی ہے۔ نوٹ بندی پر اپوزیشن کی تمام پارٹیوں نےمودی حکومت پر سخت نکتہ چینی کی تھی۔ اور اس فیصلے کو عوام مخالف فیصلہ قرار دیا تھا۔

• 9 چیف الیکشن کمشنر اور الیکشن کمشنرز کی تقرری:

سپریم کورٹ کے پانچ ججوں پر مشتمل آئینی بنچ نے حکم دیا کہ چیف الیکشن کمشنر (سی ای سی) اور الیکشن کمشنرز کا تقرر وزیراعظم، لوک سبھا میں لیڈر آف اپوزیشن اور چیف جسٹس آف انڈیا پر مشتمل کمیٹی کے مشورے پر کیا جائے گا۔ مرکز نے پینل سے چیف جسٹس آف انڈیا کی جگہ ایک کابینہ وزیر کے ساتھ بل پیش کیا۔

• 10 بھوپال گیس سانحہ کے متاثرین کے لیے اضافی معاوضہ کے لیے مرکز کی علاج کی درخواست:

مارچ میں عدالت عظمیٰ نے 1984 کے بھوپال گیس سانحے کے متاثرین کے لیے امریکہ میں قائم فرم یونین کاربائیڈ کارپوریشن کی جانب سے بڑھے ہوئے معاوضے کے لیے مرکز کی علاج کی درخواست پر غور کرنے سے انکار کر دیا، جو اب ڈاؤ کیمیکل کی ملکیت ہے۔ مرکز نے یونین کاربائیڈ کارپوریشن کی جانشین فرموں سے 7,844 کروڑ روپے طلب کیے تھے جو 470 ملین ڈالرز سے زیادہ کی رقم ہے اور یہ امریکی کمپنی سے 1989 میں تصفیہ کے حصے کے طور پر ملی تھی۔

سنہ 2023 میں سپریم کورٹ کی جانب سے ان دس اہم فیصلوں میں جموں وکشمیر کی دفعہ 370 کی منسوخی، ہم جنس پرست شادی، راہل گاندھی کے خلاف ہتک عزت معاملے میں پارلیمنٹ کی رکنیت اور مہاراشٹر کی سیاست پر سب سے زیادہ بحت کی گئی ہے۔ سیاسی لیڈروں سے لیکر عوام تک یہ امور بحث کا موضوع بنے رہے۔ اور ان معاملات پر مختلف سیاسی پارٹیوں کے رہنماوں نے مختلف رد عمل کا اظہار کیا ہے۔