'بھارت میں رہنا ہے تو اللہ کے بھروسے پر رہو'

بابائے قوم مہاتما گاندھی ایک ایسے رہنما تھے جو ہندو اور مسلمان دونوں کو اس ملک میں برابری کے ساتھ دیکھنا چاہتے ہیں۔

اس سلسلے میں گفتگو کرتے ہوئے معروف سماجی کارکن اور گاندھیائی نظریات کو فروغ دینے والے فیصل خان نے ای ٹی وی بھارت کے نمائندے سے مہاتما گاندھی کے تعلق سے خاص گفتگو کی۔

فیصل اس دور میں گاندھیائی اصول کی پاسداری کر رہے ہیں اور خان عبدالغفار خان عرف سرحدی گاندھی کی تنظیم "خدائی خدمت گار" کو فروغ دینے میں بھی مصروف ہیں۔

فیصل خان نے بتایا کہ بھارت کی تقسیم کے موقع پر مہاتما گاندھی بڑلا ہاوس میں مسلمانوں کے ایک وفد سے ملاقات کر رہے تھے، اس وقت گاندھی جی نے مسلمانوں سے کہا تھا کہ اگر آپ لوگ میرے اور پنڈت جواہر لال نہرو کے بھروسے پر اس ملک میں رکناچاہتے ہو تو اس سے بہتر ہے کہ پاکستان چلے جاؤ اور اگر یہاں رکنا ہے تو اپنے اللہ کے بھروسے پر رکو۔

مہاتما گاندھی نے مسلمانوں کے وفد سے زور دے کر کہا تھا کہ 'بھارت میں رہنا ہے تو اللہ کے بھروسے پر رہو'۔

یہ باتیں مشہور گاندھیائی رہنما فیصل خان نے مہاتما گاندھی کے مسلمانوں سے رشتوں پر روشنی ڈالتے ہوئے بتائیں۔

انہوں نے کہا کہ گاندھی جی بھارت کے ایک ایسے عظیم رہنما تھے جو ہمیشہ مسلمانوں کو برابر کی حصہ داری اور نمائندگی دینا چاہتے تھے، انہوں نے انسانیت کی خدمت کے لئے اپنے آپ کو وقف کر دیا تھا، اور محبت اور امن کے فروغ کے لئے اپنی جان تک قربانی دیدی ۔

فیصل خان جو نئی دہلی کی غفار کالونی میں سرحدی گاندھی کی تنظیم خدائی خدمت گار کی وراثت کو آگے بڑھا رہے ہیں۔

ان کا کہنا ہے کہ گاندھی جی نے کہا تھا کہ وہ ہندو مسلم ایکتا کے لئے جان کی قربانی دے سکتے ہیں اور اسی کے لئے ان کی جان بھی گئی۔