قومی دارالحکومت دہلی کی شاہجہانی جامع مسجد میں بعد نماز جمعہ جلسہ تحفظ قرآن مجید منعقد ہوا جس میں شیعہ عالم دین مولانا کلب جواد نے خصوصی شرکت کی۔
یہ جلسہ شیعہ سنی اتحاد کے طور پر منعقد کیا گیا تھا جہاں مختلف شیعہ رہنماؤں نے شاہی امام کے پیچھے جمعہ کی نماز ادا کی۔
نماز کے بعد جامع مسجد کے پہلو میں وسیم رضوی کے خلاف احتجاج کا آغاز ہوا۔ دوران احتجاج مولانا کلب جواد اور دیگر رہنماؤں نے پیدل چل کر احتجاجی مظاہرے کو آگے بڑھایا۔ مظاہرین نے وسیم رضوی کے پوسٹرز پر چپل مارکر غصہ کا اظہار کیا۔
مولانا کلب جواد نے میڈیا سے گفتگو کے دوران بتایا کہ 'کسی بھی کتاب کا کاپی رائٹ اس کے مصنف کے پاس ہوتا ہے اور قرآن کریم، اللہ کی کتاب ہے اگر اس میں کچھ ترمیم کرنا چاہتے ہیں تو انہیں اللہ کے پاس ہی جانا ہوگا۔'
اس کے علاوہ سینیئر وکیل محمود پراچہ نے کہا کہ 'وسیم رضوی یہ سب خود نہیں کر رہے بلکہ ان کے پیچھے کچھ شرپسند لوگ ہیں جو ان کا استعمال کر رہے ہیں اور ہمارا مقصد ان سب کو جیل بھجوانا ہے۔'
