نئی دہلی: قطب مینار کی کھدائی Excavation at Qutub Minar Complex سے متعلق میڈیا رپورٹس کو مسترد کرتے ہوئے مرکزی وزیر ثقافت جی کشن ریڈی نے کہا کہ وزارت نے ایسا کوئی فیصلہ نہیں کیا ہے۔ کئی میڈیا آؤٹ لیٹس نے اطلاع دی تھی کہ مرکزی وزارت ثقافت نے تاریخی یادگار کے احاطے میں کھدائی کرنے کے احکامات جاری کیے ہیں جب کہ آرکیالوجیکل سروے آف انڈیا کھدائی کے حکم پر جلد ہی کام شروع کرے گا۔ یہ افواہیں ممکنہ طور پر کلچر سکریٹری گووند سنگھ موہن کا عہدیداروں کی ایک ٹیم کے ساتھ اس تاریخی یادگار کے حالیہ دوروں سے شروع ہوئیں۔ دوسری جانب اے ایس آئی کے سابق علاقائی ڈائریکٹر دھرم ویر شرما نے دعویٰ کیا تھا کہ قطب مینار قطب الدین ایبک نے نہیں بلکہ راجہ وکرمادتیہ نے سورج کی سمت کا مطالعہ کرنے کے لیے بنایا تھا۔
مزید یہ کہ وشو ہندو پریشد کے ترجمان ونود بنسل نے یہ بھی دعویٰ کیا تھا کہ قطب مینار دراصل ایک 'وشنو استمبھ' تھا اور مبینہ غیر ملکی حملہ آوروں نے درجنوں جین ہندو مندروں کو منہدم کر کے وہاں ایک مسجد بنائی تھی۔ تاہم کھدائی سے متعلق رپورٹس کو مسترد کرتے ہوئے مرکزی وزیر جی کشن ریڈی نے واضح کیا کہ اس طرح کا کوئی حکم جاری نہیں کیا گیا ہے۔
