اندرا گاندھی ایئرپورٹ پر مشتبہ بنگلہ دیشی شہری گرفتار

گزشتہ کچھ دنوں میں مہاراشٹر اے ٹی ایس کی ٹیم نے تین مشتبہ شدت پسندوں کو گرفتار کیا ہے۔ ذرائع سے ملی اطلاع کے مطابق گرفتار شدہ شدت پسندوں سے پوچھ گچھ جاری ہے ۔

مہاراشٹر انسداد دہشت گردی اسکواڈ ٹیم (اے ٹی ایس) نے دہلی کے اندرا گاندھی بین الاقوامی ہوائی اڈے سے ایک بنگلہ دیشی شہری کو گرفتار کیا ہے، جس کی شناخت ارشاد شہاب الدین شیخ کےطور پر ہوئی ہے۔یہ بنگلہ دیش کے ضلع نوخالی کا ساکن بتایا جارہا ہے ۔

اے ٹی ایس نے اسے اس وقت گرفتار کیا جب وہ شارجہ سے دہلی واپس آیا تھا۔ اے ٹی ایس نے اسے فرضی بھارتی پاسپورٹ پر غیر ملکی سفر کرنے کی اطلاع پر گرفتار کیا ہے۔ گزشتہ کچھ دنوں میں مہاراشٹر اے ٹی ایس نے تین مشتبہ شدت پسندوں کو گرفتار کیا تھا۔

ذرائع سے ملی اطلاع کے مطابق گرفتار شدہ شدت پسندوں سے پوچھ گچھ کی گئی۔ اس دوران جب اے ٹی ایس کو ارشاد سے متعلق خبر موصول ہوئی اے ٹی ایس دہلی ایئر پورٹ پہنچ کر اسے گرفتار کر کے ممبئی لے گئی۔

پوچھ گچھ کے دوران ارشاد سے پہلے سے گرفتار شدہ شدت پسندوں کے متعلق اور شارجہ آمدو رفت کے متعلق سوالات کئے گئے۔ ابھی تک یہ واضح نہیں نہیں ہواہے کہ ارشاد کا تعلق شدت پسندوں سے ہے یا نہیں؟

اے ٹی ایس نے ارشاد کو گرفتار کر کے عدالت میں پیش کیا ، جہاں سے اسے 8 اکتوبر تک اے ٹی ایس کی تحویل میں بھیج دیا گیا ہے۔ موصولہ معلومات کے مطابق اسے غیر قانونی سرگرمیوں کے ایکٹ کے تحت گرفتار کیا گیا ہے۔