نئی دہلی: دہلی کے پیتم پورہ میں ایک اسپا میں کام کرنے والی 22 سالہ لڑکی کے ساتھ اجتماعی جنسی زیادتی کا معاملہ سامنے آیا ہے۔ الزام اسپا کے مالک اور گاہک پر ہے۔ بتایا جا رہا ہے کہ لڑکی کو اسپا میں مساج کے لیے رکھا گیا تھا۔ مساج کے دوران ملزمین نے لڑکی کو نشہ آور چیز پلا کر بے ہوش کر دیا اور پھر اس کے ساتھ جنسی زیادتی کی۔
وہیں دہلی خواتین کمیشن کی چیئرپرسن سواتی مالیوال نے اس معاملے میں ٹویٹ کیا ہے۔ اس کے بعد پولس نے کیس درج کرکے پورے معاملے کی جانچ شروع کردی۔ پولیس نے اسپا کے منیجر راہل اور کسٹمر ستیش کمار کو گرفتار کر لیا ہے۔ سواتی مالیوال نے ٹویٹ کیا، 'اسپا کی آڑ میں غلط کام کروانے کا ریکیٹ کھلے عام چل رہا ہے۔'
پولس کے مطابق موریہ انکلیو تھانے کو جمعہ کی رات تقریباً 10 بجے اطلاع ملی۔ اس کے بعد ٹیم نے چھاپہ مار کر لڑکی کو بازیاب کرایا اور طبی معائنے کے لیے ہسپتال لے گئے۔ اس دوران دہلی خواتین کمیشن کی ٹیم بھی پہنچ گئی۔
بتایا جا رہا ہے کہ لڑکی کو پہلے کہا گیا تھا کہ اسے صرف خواتین کا مساج کرنا ہے لیکن کام کے دوران اسے نشہ آور چیز پلا کر اس کے ساتھ جنسی زیادتی کی گئی۔ معاملہ سامنے آنے کے بعد سواتی مالیوال نے پولیس کو نوٹس بھیجا ہے۔ اس میں انہوں نے کئی نکات پر جواب طلب کیا ہے۔
