کانگریس رہنما سنجے نروپم نے پارٹی کے صدر کا عہدہ سنبھالنے کے لیے راہل گاندھی کے علاوہ کسی دوسرے نام کی تجویز پر سندیپ دکشت پر طنز کیا۔
انہوں نے کہا کہ' سندیپ دکشت اور ان جیسے لوگ کانگریس میں گروپ بندی حصہ ہیں اگر ان گروپ میں سے کسی کو بھی پارٹی کی لگام دی گئی، تو کانگریس زوال کا شکار ہوجائے گی'۔
نروپم نے مزید کہا کہ' کانگریس پارٹی اس وقت مشکل وقت سے گزر رہی ہے، راہل گاندھی کے علاوہ کسی اور کے کانگریس کی ذمہ داری سنبھالنے سے پارٹی ٹوٹ جائے گی'۔
انہوں نے پارٹی کے سینیئر ممبران پر بھی زور دیا کہ وہ راہل گاندھی کو کانگریس کا چارج سنبھالنے کے لیے تیار کریں۔
انہوں نے مزید کہا کہ دہلی اسمبلی انتخابات کے نتائج کانگریس کے لیے شرمناک ہیں اور 'اگر راہل گاندھی آگے نہیں آئیں گے تو کانگریس مزید مشکلات سے دوچار ہوجائے گی۔
کانگریس میں خاندانی سیاست کے بارے میں گفتگو کرتے ہوئے سنجے نروپم نے کہا کہ 'ملک میں خاندانی حکمرانی کی سیاست کوئی نیا تصور نہیں ہے۔ متعدد خاندان ہیں جنہوں نے ریاستوں پر حکمرانی کی ہے۔ جیسے مہاراشٹرا، اتر پردیش، تمل ناڈو، وغیرہ قابل ذکر ہے۔
