سیاسی پارٹیاں جہاں الیکشن مہم شروع کر رہی ہیں۔ وہیں بازاروں میں بھی انتخابی رنگ دیکھنے کو مل رہا ہے۔
دہلی کے سب سے بڑے صدر بازار میں تمام سیاسی پارٹیوں سے متعلق سامان آ چکے ہیں۔ وہ چاہیں عام آدمی پارٹی کی ٹوپی ہو یا پھر بی جے پی ،کانگریس کے جھنڈے۔
صدر بازار میں مسکان انٹر پرائزز دکان کے مالک لکشیے ناگپال نے بتایا کہ 'ہمارے پاس ہر پارٹی کی ٹوپی، جھنڈے، بیچ، اسکارف، بلے، بینڈ، ساڑیاں وغیرہ سبھی موجود ہیں۔ اس کے علاوہ جس پارٹی کی جانب سے جس سامان کا آرڈر دیا جاتا ہے ہم وہ بھی تیار کرتے ہیں۔'
دکاندار کا کہنا تھا کہ 'ایک ماہ قبل سے ہی پارٹیوں کی جانب سے ہمارے پاس آرڈر آنا شروع ہو جاتے ہیں جس کے بعد سامان تیار کیے جاتے ہیں اور سبھی الیکشن کی تاریخوں کے اعلان کے بعد سے عام آدمی پارٹی کی ٹوپی اور جھنڈے کی زیادہ مانگ ہے، وہیں دوسرے نمبر پر بی جے پی کے جھنڈے اور مودی ٹی۔ شرٹ کو لوگ بہت پسند کر رہے ہیں۔'
اس کے ساتھ ہی صدر بازار کی کئی دکانوں پر الیکشن سے جڑا سامان مل رہا ہے۔ کانگریس، بی ایس پی سمیت دیگر پارٹیوں کی ٹوپی، بائک اسٹینڈ، کی چین کے آرڈر دیے جا رہے ہیں۔
اس کے ساتھ ہی دکانداروں کا کہنا تھا کہ 'وقت کے ساتھ فیشن میں کچھ تبدیلی ضرور آئی ہے، لیکن پارٹیوں کے جھنڈے اور ٹوپی کی مقبولیت ابھی بھی برقرار ہے۔'
