کورونا کی بڑے پیمانے پر جانچ سے متعلق سپریم کورٹ میں عرضی

عرضی گذار کا کہنا ہے کہ بھارت میں کووڈ ۔19 کی جانچ پڑتال کی کمی کی وجہ سے، وائرس کے پھیلاؤ میں روز بروز اضافہ ہوتا جارہا ہے۔

ملک میں کوروناوائرس کے مثبت کیسز میں ہر روز اضافہ کو دیکھتے ہوئے سپریم کورٹ میں ایک عرضی داخل کی گئی ہے ۔

یہ الزام عائد کرتے ہوئے کہ کووڈ 19 کے پھیلاؤ اور مثبت کیسز کی تعداد میں اضافے کے باوجود جانچ کم ہورہی ہے، سپریم کورٹ میں ایک درخواست دائر کی گئی ہے جس میں مرکز اور انڈین کونسل برائے میڈیکل ریسرچ (آئی سی ایم آر) سے ہدایت کی گئی ہے کہ وہ کورونا کی جانچ کے لیے قومی جانچ کی پالیسی تشکیل دیں۔

سپریم کورٹ میں بڑے پیمانے پر کورونا کی جانچ سے متعلق عرضی

درخواست میں کہا گیا ہے کہ ' بھارت میں کووڈ ۔19 کی جانچ پڑتال کی کمی کی وجہ سے وائرس کے پھیلاؤ میں روز بروز اضافہ ہوتا جارہا ہے۔ متعدد ریاستیں کووڈ 19 کے برائے نام ٹیسٹ کروا رہی ہیں۔ کووڈ 19 کے مشتبہ علاقوں کی جانچ کرنے میں کوئی یکسانیت نہیں ہے جس کی وجہ سے شہریوں کا ٹیسٹ کرانا مشکل ہوگیا ہے۔'

درخواست گزار ڈاکٹر پینتاپتی پلا راؤ کا دعویٰ ہےکہ' چونکہ بھارت میں کورونا کی جانچ کم ہورہی ہے، وبائی مرض تیزی سے پھیل رہا ہے جس کے نتیجے میں بڑی تعداد میں اموات ہو رہی ہیں۔ جن لوگوں کو صحت سے متعلق مسائل کا سامنا، عمر رسیدہ افراد اور غریب کووڈ 19 کا شکار ہو رہے ہیں۔'

راؤ نے اپنی پی آئی ایل کے ذریعے یہ بھی بتایا کہ انہوں نے وزیر اعظم نریندر مودی ، وزیر صحت ہرش وردھن اور دیگر کے سامنے نمائندگی کی ہے۔

درخواست گزار نے الزام لگایا کہ ابھی تک کوئی کارروائی نہیں کی گئی ہے۔ اس سے قبل عدالت عظمی میں کورونا وائرس کے لئے بڑے پیمانے پر جانچ کی درخواست کرنے کے لیے اسی طرح کی درخواست دائر کی گئی تھی۔