ای ٹی وی بھارت نے دہلی کے آزاد پور اور چیت رام منڈی کیشو پور کے حوالے سے ایک تفصیلی رپورٹ شائع کی ہے جس میں منڈیوں میں کورونا سے ہونے والی اموات کے بعد اندیشہ ظاہر کیا گیا کہ اگر منڈیوں کے ذمہ داران غفلت سے باز نہیں آئے تو صورت حال انتہائی خطرناک شکل اختیار کر سکتی ہے اور اس خطرے کی پہلی دستک سنائی بھی دے دی، جب چیت رام منڈی کیشو پور میں شنٹی ٹماٹر والے کی آج موت ہو گئی۔
ہلاک شدہ رام منوہر لوہیا ہاسپیٹل میں زیر علاج تھا لیکن وہ ٹھیک نہیں ہو سکا۔ دہلی میں واقع چیت رام منڈی میں 79 نمبر کی دکان تھی، جہاں ہلاک شدہ شخص سبزی کا کاروبار کرتا تھا۔ اس شخص کا نام گھنشام ہے لیکن شنٹی ٹماٹر والے کے نام سے مشہور تھا۔
اس طرح منڈیوں میں کورونا وائرس کے بچاؤ کے مکمل انتظامات نہ ہونے سے چیت رام منڈی میں ایک اور موت واقع ہو گئی۔ اس سے پہلے بھی اس منڈی میں کورونا سے ایک موت ہو چکی ہے جبکہ آزاد پور منڈی میں اب تک چار افراد کورونا سے ہلاک ہو چکے ہیں۔ تاجر انل ملہوترہ کے مطابق حکومت اور انتظامیہ کی لاپرواہی کی وجہ سے اموات ہو رہی ہیں۔ نہ کسی طرح کا کوئی انتظام ہے، سینٹائیزیشن مشین بھی نہیں ہے اور نہ ہی ماسک تقسیم کیے جا رہے ہیں۔
