دہلی کی پٹیالہ ہاؤس عدالت نے دہشت گردی سے متعلق مالی مددکے سلسلے میں تہاڑ جیل میں بند شبیر احمد شاہ کی اپنے لئے الگ سیل مانگنے کی درخواست کی سماعت کے دوران تہاڑ جیل کو نوٹس جاری کیا ہے۔
شبیر شاہ نے یہ درخواست اپنے وکیل ایم ایس خان کے توسط سے دائر کی ہے۔ شبیر شاہ اس وقت دو معاملوں میں تہاڑ جیل میں بند ہیں۔ ایک دہشت گردی کی مالی اعانت کے بارے میں اور دوسرا منی لانڈرنگ کے بارے میں۔
سال 2007 میں شبیر شاہ کے خلاف 2005 میں منی لانڈرنگ کے معاملے میں مقدمہ درج کیا گیا تھا۔ شبیر شاہ کو انفورسمنٹ ڈائرکٹوریٹ نے 25 جولائی 2017 کو گرفتار کیا تھا۔
این آئی اے نے مزید تفتیش کے بعد پانچ ملزمان کو گرفتار کرلیا۔ شبیر شاہ کو جون 2019 میں این آئی اے نے گرفتار کیا تھا۔
این آئی اے کے ذریعہ گرفتار ملزمان میں یاسین ملک، آسیہ اندرابی، مسرت عالم، انجینئر رشید اور شبیر احمد شاہ شامل ہیں۔ ان پر لوگوں کو احتجاج کے لئے اکسانا، پتھرائو اور دہشت گردانہ حملوں کے لئے دہشت گردی کی مالی اعانت میں ایک دوسرے کی مدد کرنا، اور لوگوں کو انتظامیہ کے خلاف اکسانے کا الزام ہے۔
